Never Have I Ever-ის მეორე სეზონსა და დევის ისტორიის გაგრძელებას გულშემატკივრები უკვე დიდი ხანია ელოდებიან. როგორც იქნა, ნეტფლიქსმა ახალი სეზონის პრემიერის თარიღიც გაგვიმხილა: დევი და მისი მეგობრები 15 ივლისს ბრუნდებიან!

ნეტფლიქსის მიხედვით, სერიალის შემქმნელები და მსახიობები 17 ივნისს ფანებისთვის შეხვედრას გამართავენ, სადაც მათ სერიალის შესახებ კითხვებსა და სხვადასხვა თამაშებს შესთავაზებენ. რაც მთავარია, შეხვედრას მეორე სეზონის ტრეილერი დააგვირგვინებს!

Never Have I Ever-ის თანაავტორები მინდი კალინგი და ლანგ ფიშერი არიან, ეს უკანასკნელი კი შოუს სცენარისტი და აღმასრულებელი პროდიუსერიცაა.სერიალი თანამედროვე ინდოელი ამერიკელი თინეიჯერი გოგონას, დევი ვიშვაკუმარის ისტორიას გვიყვება, რომელიც მამის გარდაცვალების შემდეგ სკოლაში ბრუნდება. დევის ფეთქებადი ხასიათი, მისი საუკეთესო მეგობრები, მომხიბვლელი პაქსტონი და დევის ოჯახი გოგონას თავგადასავლებით სავსე ყოველდღიურობას კიდევ უფრო ქაოტურს, სასაცილოსა და ხანდახან სევდიანსაც ხდის.

მეორე სეზონიც, პირველის მსგავსად, დევის სკოლასა და სახლში მიმდინარე საინტერესო ყოველდღიურობით იქნება სავსე, რომელსაც, რა თქმა უნდა, მისი ახალი რომანტიკული ურთიერთობაც დაემატება! როგორ გაართმევს ახალ სირთულეებსა და გამოწვევებს თავს ჩვენი საყვარელი მთავარი პერსონაჟი, ამას 15 ივლისს გავიგებთ!