შინაგან საქმეთა სამინისტროს ინფორმაციით, 29 მაისს წყალტუბოს მუნიციპალიტეტის სოფელ გუმათში ნამახვანჰესის მოწინააღმდეგეთა აქციაზე პოლიციელზე თავდასხმის ბრალდებით კიდევ ერთი პირი დააკავეს.

უწყების ცნობით საქმეზე გამოძიება სისხლის სამართლის კოდექსის 353-ე პრიმა მუხლის პირველი ნაწილით მიმდინარეობს, რაც 4-დან 7 წლამდე ვადით თავისუფლების აღკვეთას ითვალისწინებს.

29 მაისს სოფელ გუმათში საპროტესტო აქციაზე პოლიციელზე თავდასხმის ბრალდებით აქციის მონაწილე დააკავეს.

გამოძიების ვერსიით, ბრალდებულმა 29 მაისს სოფელ გუმათში ნამახვანჰესის მოწინააღმდეგეთა საპროტესტო აქციაზე თავს დაესხა და ფიზიკური შეურაცხყოფა მიაყენა სამსახურებრივი მოვალეობის შესრულების პროცესში მყოფ პოლიციის თანამშრომელს.

როგორც უწყებაში ამბობენ, ბრალდებულის დაკავების დროს სოფელ საყულიოში პოლიციის თანამშრომლებს წინააღმდეგობა გაუწიეს ადგილობრივმა მაცხოვრებლებმა, რის შემდეგაც პოლიციამ კანონმდებლობის შესაბამისად იძულების ღონისძიება გამოიყენა.