უკრაინის პრემიერმინისტრის, დენის შმიგალის განცხადებით, საქართველოსა და უკრაინას შორის დღევანდელი ურთიერთობა ერთობლივ მიზნებს ემყარება, NATO-სა და ევროკავშირში გაწევრიანების თვალსაზრისით. უკრაინის პრემიერმინისტრი საქართველოში ოფიციალური ვიზიტით იმყოფება. საქართველოს პრემიერმინისტრთან ერთად კი მთავრობის ადმინისტრაციაში ერთობლივი ბრიფინგი გაიმართა.

"მე დარწმუნებული ვარ, რომ ევროკავშირსა და NATO-ში ჩვენი ქვეყნების შესვლა დროის საკითხია. ჩვენი მხრიდან, საქართველოსა და უკრაინის მთავრობები ყველაფერს აკეთებენ, რათა მიაღწიონ ამისათვის საჭირო კრიტერიუმებს", — განაცხადა შმიგალმა.

შმიგალმა ხაზი გაუსვა ასოცირებულ ტრიოს, რომელიც რამდენიმე კვირის წინ უკრაინამ, საქართველომ და მოლდოვამ შექმნეს. მისივე თქმით, ეს ხაზს უსვამს სამივე ქვეყნების ამბიციებს გახდნენ ევროკავშირის წევრები და საშუალებას იძლევა უკეთ მოემზადონ აღმოსავლეთ პარტნიორობის სამიტისთვის.