სიცილიუrი მაფიის კოზა ნოსტრას ბოსი, რომელსაც ასამდე ადამიანის მკვლელობას აწერენ, 25-წლიანი პატიმრობის შემდეგ ციხე ვადამდე ადრე დატოვა.

ჯოვანი ბრუსკას ადანაშაულებენ მაფიასთან მებრძოლი მოსამართლის, ჯოვანი ფალკონეს, მისი ცოლისა და სამი დაცვის თანამშრომლის მკვლელობაში. ამასთან, ის კავშირშია მაფიის სხვა წევრის 11 წლის შვილის წამებასა და მკვლელობაში.

ბრუსკა 1996 წელს დააკავეს და უვადო თავისუფლების აღკვეთა მიუსაჯეს. ახლა ის ვადამდე ადრე ოთხწლიანი გამოსაცდელი ვადით გაათავისუფლეს, რამაც პოლიტიკოსებისა და საზოგადოების აღშფოთება გამოიწვია.

64 წლის ჯოვანი ბრუსკა კოზა ნოსტრას საკვანძო ფიგურა იყო. როგორც BBC წერს, 1992 წელს მან პირადად ააფეთქა გზაზე დამაგრებული ასაფეთქებელი, რის შედეგად მოსამართლე ფალკონე დაიღუპა. ორი თვის შემდეგ მან ფალკონეს კოლეგა, პაოლო ბარსელონიც მოკლა.

კიდევ ერთი სასტიკი მკვლელობა, რომელიც ბრუსკას უკავშირდება, 11 წლის ჯუზეპე დი მატეოს შეეხება. ის მაფიის ერთ-ერთი წევრის შვილი იყო, რომელიც ბრუსკმა ღალატში იეჭვა. ბიჭი აწამეს, გაგუდეს და მისი სხეული მჟავაში დაშალეს.

1996 წელს დაკავების შემდეგ, ბრუსკამ სახელმწიფო ბრალდების მოწმის სტატუსი მიიღო და გამოძიებას რამდენიმე დამნაშავის პოვნაში დაეხმარა.

მაფიის ბოსის გათავისუფლებამ იტალიაში ბევრის აღშფოთება გამოიწვია. მოსამართლე ფალკონეს ერთ-ერთი დაცვის წევრის ცოლი ამბობს, რომ სახელმწიფო მათ წინააღმდეგ მოქმედებს.

"29 წელი გავიდა და ჩვენ კიდევ სრული სიმართლე არ ვიცით. ხოლო ჯოვანი ბრუსკა, რომელმაც ჩემი ოჯახი გაანადგურა, თავისუფლებაზე", — აღნიშნა ტინა მონტინარომ.

ჯოვანი ფალკონეს და, მარია ჟურნალისტებს უყვება, რომ დამწუხრებულია, თუმცა აცნობიერებს, რომ კანონი ასეთია და ბრუსკას უფლება ჰქონდა ციხე ვადაზე ადრე დაეტოვებინა.