საქართველოს ექსპრეზიდენტი, მიხეილ სააკაშვილი ამბობს, რომ 10-15 წლის წინ ის ჰესების აშენების მომხრე იყო, მაგრამ ახლა რეალობა შეიცვალა. მისი მტკიცებით, მას იარლიყებს აკერებენ, "რომ სააკაშვილმა პოზიცია შეიცვალა".

"მთელი ეს დღეები მესმის, ჩემს ციტატებს ატრიალებენ, რომ სააკაშვილი იყო მომხრე ჰესის აშენების. დიდი ჭკუით არ მოსდით იმ ხალხს, ვინც ატრიალებს ამ ციტატებს. ეს რომელ წლებში ვიყავი მომხრე? 10-15 წლის წინ, ხომ? დიახ, ვიყავი მომხრე, თუმცა არასოდეს პროექტს არ დავამტკიცებდით, რომელიც საფრთხეს შეუქმნიდა ქალაქ ქუთაისს, ან რიონს გააქრობდა... მინდა, ჩვენ მომხრეებს ვუთხრა, ვინც ამას მხარს უჭერს და ჩვენ მლანძღველებსაც, 10 და 15 წლის წინ რაც იყო და რაც არის ახლა, ეს არის ორი სხვადასხვა რეალობა", — აცხადებს სააკაშვილი.

ის ირწმუნება, რომ, 2009-2010 წლებში ჰქონდათ გეგმა, რომ პრეზიდენტის სასახლე მთლიანად ქარის დანადგარებზე გადაეყვანათ. დაედგათ ქარის ორი დანადგარი პრეზიდენტის სასახლის უკან როგორც სიმბოლო, რომ ქვეყანა მწვანე ენერგიაზე გადადის.

"ჩვენ გვინდოდა საერთოდ მწვანე ენერგიაზე გადასვლა. ახლა უამრავი ახალი ტექნოლოგიაა მეგობრებო, არის მწვანე წყალბადის ტექნოლოგია, მაშინ არ იყო ეს, როცა ვამბობდით, რომ ჰესები უნდა ავაშენოთ", — ამბობს სააკაშვილი.

ის ახლა ამბობს, რომ საქართველოს დიდი ჰესები არ სჭირდება და რომ ეს მისი მყარი პოზიციაა.

"მოდით, გავაკეთოთ სერიოზული დისკუსია და შევწყვიტოთ ერთმანეთისთვის იარლიყების მიკერება. ოჰ, სააკაშვილმა შეიცვალა პოზიცია. მე პოზიცია კი არ შევიცვალე. მაშინ პოზიცია ასეთი იყო სწორი, ძირითადში, რა თქმა უნდა, არა ამ სახით, როგორც დღეს არის წარმოდგენილი მთავრობის მიერ მოწერილ დოკუმენტზე. ახლა კონტექსტი არის სულ სხვა და ჩვენ ვიმოძრავებთ ამ კონტექსტში ამ მიმართულებით", — აცხადებს საქართველოს ყოფილი პრეზიდენტი.

ის, ასევე, ნამახვანჰესის ირგვლივ განვითარებულ მოვლენებზე ქართული ოცნების მოქმედებებს აკრიტიკებს.

"ეს უნდა იყოს ძალიან დამჯდარი, ნორმალური საუბარი და არა ის, რომ პოლიციის ენით და რკინის ჯებირებით ველაპარაკებოდეთ ხალხს. საკუთარ სახლში არ უშვებს პოლიცია ხალხს იმის გამო, რომ ივანიშვილი მოელაპარაკა და 25%-იან წილში ჩაჯდა. ახლა, ვინც რა უნდა ილაპარაკოს, სიმართლეს თვალი უნდა გავუსწოროთ. ჩიტი ვერ გადაიფრენს საქართველოს ბიზნესში, მით უმეტეს დიდ ბიზნესში ივანიშვილის წილის გარეშე. ეს იცის ყველამ და ამაში, სხვათა შორის, ძალიან განვსხვავდებით ჩვენ. იმიტომ, რომ, მე ერთი კაპიკი არ წამომიღია საქართველოდან და არცერთ ბიზნესში არ ვმონაწილეობდი და ეს იყო ჩვენი ცხოვრების პრინციპი. ჩვენი და ჩემი გუნდის აბსოლუტური უმეტესობის", — ირწმუნება ის.

სააკაშვილის თქმით, ახლა ჰესები პროგრესული აღარაა და მიიჩნევს, რომ საქართველოს ახლა ტურიზმის განვითარება სჭირდება.