UFC-ს მოქმედი ჩემპიონი ხაბიბ ნურმაგამედოვი ოკუპირებულ აფხაზეთში აღარ ჩავა. ის სოხუმში პირველ ივნისს ჩადიოდა, სადაც ბავშვებისთვის მასტერკლასი უნდა ჩაეტარებინა.

ნურმაგამედოვის გაუქმებულ ვიზიტზე ინფორმაცია სპორტისა და ახალგაზრდობის საკითხებში დე ფაქტო სახელმწიფო კომიტეტმა სპორტმენის მენეჯერზე, რიზვან მაგომედოვზე დაყრდნობით გაავრცელა. როგორც დე ფაქტო კომიტეტის მიერ გავრცელებულ განცხადებაშია აღნიშნული, გეგმების შეცვლის მიზეზი აშშ-სა და საქართველოს მხრიდან სანქციებით ზეწოლაა, რომელიც მოიცავდა ამერიკული ვიზის ანულირების მუქარა, UFC-ში სპორტული მოღვაწეობის შეზღუდვასა და აშშ-ში კონტრაქტების გაუქმებას.

ხაბიბის ოკუპირებულ რეგიონში ჩასვლაზე ინფორმაცია ჯერ კიდევ თებერვალში გავრცელდა. მაშინ სახელმწიფო მედია აპსნიპრესი წერდა, რომ ვიზიტი ეპიდემიოლოგიური სიტუაციის მიხედვით, სავარაუდოდ გაზაფხულზე დაიგეგმებოდა და ნურმაგამედოვი დე ფაქტო ხელისუფლების წარმომადგენლებსაც შეხვდებოდა.

ცნობილია, რომ ნურმაგამედოვი ქართული ოცნების ლიდერთან, კახა კალაძესთან და პარტიის დამფუძნებლის შვილთან, მომღერალ ბერა ივანიშვილთან დაახლოებული პირია. მათ ნაცნობობას ადასტურებს ხაბიბის გამოგზავნილი საჩუქრები, რომელზეც ბერა და კალაძე წერდნენ: "მადლობა ძმაო", "მადლობა ლეგენდავ".

ახლო ურთიერთობას მოწმობს რამდენიმე თვის წინ კალაძის მიერ გამოქვეყნებული ინსტაგრამსთორიც, სადაც ჩანდა, რომ ის ნურმაგამედოვი, ბერა და რამდენიმე პირი ზუმში საუბრობდნენ. ამ ფოტომ გააჩინა ეჭვი იმის შესახებ, რომ ნურმაგამედოვი საქართველოში ვიზიტს გეგმავდა.

აღსანიშნია ისიც, რომ სპორტსმენი საქართველოში უკვე არის ნამყოფი 2018 წელს. იმ შემთხვევაში თუ ის ოკუპირებულ რეგიონში ჩავიდოდა, ოკუპაციის კანონის დარღვევის გამო საქართველოს ხელისუფლების მიერ კონტროლირებად ტერიტორიაზე შემოსვლას რამდენიმე წლით ვეღარ შეძლებდა.