ნამახვანჰესის მოწინააღმდეგე აქტივისტის, ვარლამ გოლეთიანის განცხადებით, გადაწყვიტეს, რომ ფინანსები არ დარჩეს "სპეკულაციის საგნად", ამიტომ აუდიტი დაიქირავეს და მალე დაფინანსებასთან დაკავშირებით ყველაფერს საკუთარ ფეისბუქგვერდზე გაასაჯაროვებენ.

"მინდა ვთქვა დაფინანსებაზე, რაც არის მნიშვნელოვნად აგორებული შავი პიარკამპანიის ნაწილი ჩვენი მისამართით. რაც შეეხება დაფინანსების მხარეს, იცით, რომ ჩვენი ემიგრაციაა ჩართული ამ პროცესებში და ძირითადად მათგან მოდის დაფინანსება და ჩვენი საზოგადოება, მათ შორის, ვინც აქ ვდგავართ აქტიურ მონაწილეობას — ფინანსურს, ფიზიკურს, მორალურს — იღებს ამ პროცესში. ამიტომ გადავწყვიტეთ, რომ არ დარჩეს ეს ფინანსები სპეკულაციის საგნად, დავიქირავეთ აუდიტი, რომელიც ამ ხარჯებს, ყველაფერს დააბალანსებს თუ როგორც არის და რა მოვალეობაც ეკისრება და შემდეგ ყველაფერი ჩვენს ფეისბუქგვერდზე გამოქვეყნდება", — თქვა მან.

რამდენიმე დღეა აქტიური განხილვის საგანი გახდა, ვინ აფინანსებს რიონის ხეობის მცველებს. მოქალაქეთა მცირე ნაწილი საუბრობს სავარაუდო პარტიულ ან რუსულ ინეტერესებზე, თუმცა თავიანთი თეორიები არ დაუსაბუთებიათ. აქტივისტები ბრალდებებს უარყოფენ და აცხადებენ, რომ თანხას ძირითადად მხარდამჭერებისგან და ემიგრანტებისგან იღებენ. ნამახვანჰესის მოწინააღმდეგეთა დაფინანსებით დაინტერესება გამოთქვა ქართული ოცნების თავმჯდომარე ირაკლი კობახიძემაც.