რუსული სახემწიფო მედიის, TASS-ის ცნობით, რუსმა სენატორმა, გრიგორი კარასინმა პრემიერმინისტრის სპეციალურ წარმომადგენელთან, ზურაბ აბაშიძესთან საუბრისას განაცხადა, რომ დაუშვებელია ახალი "პროვოკაციები" რუსეთის მოქალაქეების მიმართ. სავარაუდოა, რომ ის სერგეი გავრილოვისა და ვლადიმერ პოზნერის ვიზიტებით გამოწვეულ პროტესტს გულისხმობს, რადგან ეს აქციები პროვოკაციად აქამდეც არაერთხელ შეაფასა.

"პოზიტიური დინამიკა [ტვირთბრუნვაში] ეწინააღმდეგება საქართველოს ზოგიერთი წარმომადგენლის ღიად არამეგობრულ განცხადებებსა და ნაბიჯებს რუსეთის მიმართ, მათ შორის საერთაშორისო არენაზე, რაც ხელს უშლის პრაქტიკული ურთიერთქმედების განმტკიცებასა და ურთიერთობების ნორმალიზების ობიექტურად ხელსაყრელ პროცესს. რუსუთის მხრიდან საქართველოს ტერიტორიაზე ჩვენი ქვეყნის მოქალაქეების მიმართ ახალი პროვოკაციების დაუშვებლობის მნიშვნელობას გაესვა ხაზი", — ტასის ცნობით განაცხადა კარასინმა აბაშიძესთან ონლაინ ფორმატში შეხვედრისას.

სხვადასხვა დროს კარასინი ამტკიცებდა იმასაც, რომ "პროვოკაციები" ხდება საქართველოში ტურისტული ვიზიტით მყოფი რუსეთის სხვა მოქალაქეების მიმართაც, თუმცა მსგავსი შემთხვევა არ დაფიქსირებულა. როგორც სამთავრობო გუნდი და ოპოზიცია, ასევე, სამოქალაქო აქტივისტები საჯაროდ აცხადებდნენ, რუსი ტურისტებისთვის ქვეყნის კარი ღიაა. საპროტესტო აქციის მონაწილეები კი ხაზს უსვამდნენ, რომ სამიზნეები მხოლოდ კრემლის პოლიტიკის გამტარები არიან.

საქართველოს მთავრობის ცნობით, ქართულ-რუსული არაფორმალური დიალოგის ფარგლებში, აბაშიძე-კარასინის შეხვედრაზე სავაჭრო-ეკონომიკური, სატრანსპორტო და ჰუმანიტარული ურთიერთობების საკითხები განიხილეს.

აბაშიძე-კარასინის შეხვედრა ონლაინ ფორმატში დღეს, 21 მაისს გაიმართა. შეხვედრაში მონაწილეობა მიიღეს ორი ქვეყნის საგარეო და სატრანსპორტო უწყებების წარმომადგენლებმაც.

ქართული მხარის ინფორმაციით, შეხვედრის დასაწყისში ზურაბ აბაშიძემ ოკუპირებულ აფხაზეთსა და ცხინვალის რეგიონში არსებულ რთულ ვითარებაზე, უსაფრთხოებისა და ჰუმანიტარული მდგომარეობის გაუარესებაზე და ადამიანის უფლებების ხელყოფის ფაქტებზე გაამახვილა ყურადღება.

"კერძოდ, ხაზი გაესვა უკანონო პატიმრობაში მყოფი საქართველოს ყველა მოქალაქის სასწრაფო განთავისუფლების აუცილებლობას. ამ კონტექსტში აღინიშნა, რომ ჟენევის საერთაშორისო მოლაპარაკებები საქართველოსა და რუსეთს შორის უსაფრთხოების და ჰუმანიტარული საკითხების განხილვის უმთავრეს ფორმატს წარმოადგენს.

აღინიშნა, რომ სავაჭრო ურთიერთობებში ორ ქვეყანას შორის 2021 წლის იანვარ-აპრილში შეინიშნება პოზიტიური დინამიკა, გასული წლის ანალოგიურ პერიოდთან შედარებით. სავაჭრო ბრუნვა გაიზარდა 20%-ით და 476 21 მლნ. აშშ დოლარი შეადგინა. კერძოდ, ქართული პროდუქციის ექსპორტი გაიზარდა 27%-ით და შეადგინა 159 61 მლნ. აშშ დოლარი, ხოლო იმპორტი გაიზარდა 17%-ით და შეადგინა 316 60 მლნ. აშშ დოლარი. გაზრდილია სატვირთო გადაზიდვებიც. მიმდინარეობს შარშანდელი პანდემიური შოკით გამოწვეული ვარდნის გადალახვის პროცესი. საუბარი შეეხო ქონებრივი საკითხების მოგვარებასაც", — ნათქვამია განცხადებაში.

მთავრობის თანახმად, ყურადღება გამახვილდა სავაჭრო და სატრანსპორტო სფეროებში ჩართული კომპანიების ინტერესების დაცვასა და პრობლემების მოგვარებაზე.

პრაღის კარასინ-აბაშიძის მოლაპარაკებების ფორმატი 2012 წლიდან არსებობს. ეს მოსკოვსა და თბილისს შორის ერთადერთი პირდაპირი მოლაპარაკებების ფორმატია.

საქართველომ რუსეთთან დიპლომატიური ურთიერთობები 2008 წელს გაწყვიტა.