23 მაისს რუსთავის საერთაშორის ავტოდრომზე, საქართველოში პირველად, Georgian Historic Vehicles Association-ის ორგანიზებით Festival of Speed გაიმართება. ეს იქნება ყველაზე დიდი კლასიკური ავტომობილების გამოფენა და ავტომოყვარულებს 12:00 საათიდან უმასპინძლებს.

"ამ ტიპისა და მაშტაბის საავტომობილო ფესტივალი საქართველოში პირველად ტარდება. ფესტივალის მიზანია, მთელ რეგიონში დანერგოს საავტომობილო ფესტივალების კულტურა, რაც ძალიან მნიშვნელოვანია როგორც საავტომობილო კულტურის ისტორიული ნაწილის ჩამოსაყალიბებლად, ასევე ჯანსაღი სპორტული და გასართობი ღონისძიების დასანერგად", — აცხადებს ლაშა ნარსია, Porsche Club Georgia-ის პრეზიდენტი და ფესტივალის ორგანიზატორი.

ღონისძიება საგამოფენო, სარბოლო და გასართობ ნაწილებად წარიმართება.

საგამოფენო

ავტოდრომზე ე.წ. Padock-ის ტერიტორიაზე სტუმრებისთვის მოეწყობა უნიკალური და იშვიათი ავტომობილების გამოფენა.

სარბოლო

რბოლა გაიმართება ავტოდრომზე Time Attack ის რეჟიმში, ყველა ეპოქის ავტომობილებთან ერთად. პირველად წარმოდგენილი იქნება Historic კლასი, რომელიც ასევე საუკეთესო დროისათვის იბრძოლებს.

გასართობი

სტუმრებს ადგილზე დახვდებთ მუსიკალური, კვებისა და Gymkhana-ს ზონები, რაც დროის სასიამოვნოდ გატარების შესაძლებლობას მისცემთ.

მაყურებლებისათვის დასწრება სრულიად უფასოა. აუცილებელია Covid-19-ის საწინააღმდეგო რეგულაციების დაცვა.

ფესტივალის მხარდამჭერი და პარტნიორია Myauto, სწორი საავტომობილო კულტურის განვითარებისა და ავტოსპორტის ხელშეწყობისათვის.