რამდენიმე დღის წინ Studio Ghibli-ის ოფიციალურ ტვიტერზე საინტერესო პოსტი გამოჩნდა. Studio Ghibli-ის საყოველთაოდ ცნობილი ანიმაციური ფილმის, My Neighbour Totoro-ს პოპულარულ სცენაში საკულტო პერსონაჟის, ტოტოროს გვერდით Pixar-ის Monsters, Inc.-ის ცნობილი პერსონაჟები — სალი და მაიკი აღმოჩნდნენ.

ტვიტერზე ილუსტრაცია აღწერის გარეშე გამოქვეყნდა, რამაც გულშემატკივრების ინტერესი და გაოცება გააორმაგა. აღტაცებულ ფანებს მხოლოდ ერთი კითხვა უტრიალებთ: ნუთუ Studio Ghibli და Pixar კოლაბორაციას გეგმავენ?

2010 წელს ტოტორო პიქსარის ანიმაციურ ფილმში, Toy Story 3-ში უკვე გამოჩნდა. რეჟისორები ჰაიაო მიაძაკი და ჯონ ლასიტერი კი ერთმანეთის ნამუშევრებისადმი პატივისცემას არასდროს მალავდნენ. ამ დეტალების გათვალისწინებით, კოლაბორაცია გასაკვირი სულაც არ იქნებოდა.

მართალია, ილუსტრაციის ავტორი ჯერ ცნობილი არაა, თუმცა, როგორც აღმოჩნდა, აღნიშნული ილუსტრაცია Studio Ghibli-ის ტოკიოს ოფისშიც შეუნიშნავთ.

ჯერჯერობით ამ საკითხთან დაკავშირებით დამატებითი ინფორმაცია ცნობილი არაა, ამიტომ ანიმაციური ფილმების მოყვარულებს ისღა დაგვრჩენია, მოვლენების განვითარებას დაველოდოთ და ვინატროთ, რომ ანიმაციური სამყაროს ორი გიგანტი მალე საერთო პროექტით გაგვახარებს.