ქართული ოცნების დეპუტატი, ირაკლი ქადაგიშვილი პარლამენტში ნაციონალური მოძრაობის შესვლის შემთხვევაში მეტ "ხმაურს" ვარაუდობს და აცხადებს, რომ მათი მოღვაწეობა ძირითადად "მასკარადი" იქნება. ამის შესახებ მან ჟურნალისტებს განუცხადა.

"ალბათ, უფრო მეტი ხმაური იქნება, კონსტრუქციული და საქმიანი ვითარება, რა თქმა უნდა, ნაციონალური მოძრაობის შემოსვლით არ შეიქმნება, იმიტომ, რომ ჩვენ როგორც ვხედავთ, ჯერჯერობით ისინი მაინც პარლამენტს არა საკანონმდებლო ორგანოდ, არამედ რევოლუციური სცენარის ერთ-ერთ იარაღად განიხილავენ. ამიტომ იქნება მასკარადი მათი მოღვაწეობა ძირითადად", — ამბობს ქადაგიშვილი.

ნაციონალური მოძრაობის თავმჯდომარემ, ნიკა მელიამ 12 მაისს თქვა, რომ პარლამენტში შესვლის შესახებ პარტიაში "მჭიდრო კონსულტაციები" მიმდინარეობს და გადაწყვეტილება უახლოეს პერიოდში იქნება ცნობილი. ზაალ უდუმაშვილის თქმით კი, პარლამენტში შესვლა-არშესვლასთან დაკავშირებით გადაწყვეტილება, შესაძლოა, კიდევ ორი კვირა ვერ მიიღონ.

6-თვიანი ბოიკოტის შემდეგ, ოპოზიციის ნაწილმა ევროპული საბჭოს პრეზიდენტის, შარლ მიშელის დოკუმენტს ხელი მოაწერა და 27 აპრილს პარლამენტში მივიდა. დოკუმენტს ამ დრომდე ხელს არ აწერს ნაციონალური მოძრაობა. პარტიაში ამბობდნენ, რომ დოკუმენტს ხელს ნიკა მელიას გათავისუფლებამდე არ მოაწერდნენ. აღსანიშნავია, რომ დოკუმენტს ინდივიდუალურად მოაწერა ხელი სალომე სამადაშვილმა.