პარლამენტის დეპუტატი, კახა კახიშვილი ამბობს, რომ ქართული ოცნებიდან წასვლის საფუძველი არ აქვს, თუმცა არის საკითხები რომლებსაც არ ეთანხმება. ფორმულასთან საუბრისას მან ისაუბრა, თუ რა ვითარებაში შეიძლება, პარტიის დატოვება მოუწიოს.

"ამ ეტაპზე არ მაქვს საფუძველი, რომ განვაცხადო, გავდივარ "ოცნებიდან". თუმცა არის საკითხები, რომელსაც არ ვეთანხმები. ვნახავ, როგორ იქნება როგორ დალაგდება. თუ ვნახავ, რომ ჩემს განცხადებებს რეაგირება არ მოჰყვება, მივიღებ გადაწყვეტილებას. თუ ვნახავ, რომ ჩემი საკითხი, ჩემი რესურსი ამოწურულია ქართულ ოცნებაში და მე იქ არაფერს წარმოვადგენ, ცხადია იმ პარტიაში ვერ დავრჩები, სადაც მხოლოდ ჩამთვლიან, რომ უპირობო შემსრულებელი ვარ", — განაცხადა კახიშვილმა.

მისივე თქმით, ის არ ეთანხმება გარკვეულ საკითხებს, მათ შორის თვითმმართველობის არჩევნებისთვის პროპორციულ სისტემაზე გადასავლასა და მაჟორიტარების რაოდენობის შეკვეცას:

"თვითმმართველობის არსი ისაა, რომ კომუნიკაციაში იყო ადამიანებთან. დღეს ამ სისტემით უშუალო კომუნიკაციაში არიან, ძირითადად, მაჟორიტარები".

კახიშვილთან დაკავშირებით კითხვა დაუსვეს ქართული ოცნების თავმჯდომარეს, ირაკლი კობახიძეს. ერთ-ერთი ჟურნალისტმა კობახიძეს ჰკითხა, რატომ გადაწყვიტეს გუნდში, რომ კახიშვილი უკანა რიგებში გადაეწიათ. კობახიძემ უპასუხა, რომ დეპუტატს პარლამენტში ორი სხვადასხვა კომიტეტის თავმჯდომარეობა შესთავაზეს, თუმცა სხვადასხვა მიზეზის გამო კახიშვილმა უარი განაცხადა.

"თუ არის რაიმე ინტერესი, სხვადსხვა მიმართულებით უფრო აქტიურად იყოს ჩართული, ის საკმაო გამოცდილების მქონე გუნდის წევრია და, შესაბამისად, გვექნება მასთან კონსულტაცია", — განმარტა კობახიძემ.

კახიშვილი ამბობს, რომ მისთვის გაუგებარია, რატომ გახდა "ოთხ კაცში" გამართული საუბარი განხილვის საგანი და რატომ გახდა ამის გარეთ გატანა საჭირო.

"ამით კარგია ის მაინც, რომ დაადასტურეს ამით, რომ ჩემთვის საოცნებო თანამდებობა არაა. [...] რადგან ჟურნალისტმა დაუსვა კითხვა, რომ კახიშვილი მიდის, გაუკვირდა, რატომ მიდის, აგერ თანამდებობა შევთავაზეთო. მეორე საკითხია, რომ მხოლოდ თანამდებობა არ არის ყოველთვის გადაწყვეტილების მიღების საფუძველი", — აცხადებს კახა კახიშვილი.