დაავადებათა კონტროლის ცენტრის ხელმძღვანელი, ამირან გამყრელიძე ამბობს, რომ ერთ-ერთი ვერსიით 12 მაისს booking.moh.gov.ge-ს ვებგვერდი ხარვეზებით დიდი ტრაფიკის გამო მუშაობდა. როგორც გამყრელიძემ რუსთავი 2-ის ეთერში თქვა, გაუმართავი მუშაობის მიზეზები ჯერ კიდევ კვლევის საგანია.

"როგორც IT-სამსახურები გვეუბნებიან, იყო ძალიან დიდი ტრაფიკი, სადღაც 800 ათასამდე შემოსვლის მცდელობა და, დაახლოებით, ეს იყო, რომ სისტემამ ვერ გაუძლო. მსგავსი არ ყოფილა მას შემდეგ, რაც იმუნიზაციის პროცესი მიდის, ანუ 15 მარტის შემდეგ. გაკეთდა ის, რომ დღეს რამდენიმე უწყების IT-სამსახურები აწარმოებენ აუდიტს როგორც პროგრამული ნაწილის, ისე გამტარუნარიანობის და სერვერების", — აღნიშნა გამყრელიძემ.

12 მაისს 20:00 საათიდან Sinopharm-ის მეორე დოზებზე რეგისტრაცია დაიწყო, თუმცა სარეგისტრაციო პორტალი booking.moh.gov.ge ხარვეზებით მუშაობდა. გარდა ამისა, 20:00 საათიდან დაიწყო რეგისტრაცია AstraZeneca-ს დოზებზე 45 წელს ზემოთ მოქალაქეებისთვისაც.

მოქალაქეები წერდნენ, რომ ვებგვერდზე ვერ რეგისტრირდებოდნენ და ის რამდენიმე საათის განმავლობაში გაუმართავად მუშაობდა.