სტრატეგია აღმაშენებლის ლიდერი, გიორგი ვაშაძე ამბობს, რომ კარგი იქნება თუ ნაციონალური მოძრაობის თავმჯდომარე, ნიკა მელია პარტიას დატოვებს და მესამე პოლიტიკურ ძალას შეუერთდება. როგორც ვაშაძე გადაცემა პოლიტ-ქალაში განმარტავს, ეს სრულად შეცვლის პოლიტიკურ პროცესს.

რაც შეეხება თბილისის მერობის კანდიდატად მელიას მხარდაჭერას, იგი ნაციონალურ მოძრაობის წევრებს "პოლიტიკურ სპეკულანტებს" უწოდებს. ვაშაძის თქმით, მას არსად უთქვამს, რომ მელიას მხარს არ დაუჭერდა და მხოლოდ ამბობდა, რომ ენმ-ს პარტიიდან საერთო-ოპოზიციურ კანდიდატის დაყენება წაგება იქნება.

"ნაცმოძრაობას ვერ გადავათქმევინებთ, ის თავის კანდიდატს დააყენებს. მე ვამბობ, იყოს მესამე ცენტრის კანდიდატი, რისთვისაც მე აქტიურად ვმუშაობ. უფრო მეტიც ვთქვი, რომ რამე არ გეგონოთ, მე ჩემს პერსონალურ ამბიციას გვერდზე გადავდებ-მეთქი. რას შვებიან ესენი? ვითომ არ იციან, რას ვლაპარაკობ, ხომ ვიცნობ მათ მოხარშულს ყველას. აი, მელიას უპირისპირდებაო. უფრო მეტს ვამბობ. მელია თუ წამოვა ნაცმოძრაობიდან და შემოუერთდება მესამე პოლიტიკურ ცენტრს, ძალიან მაგარი იქნება, ჩემი აზრით", — განაცხადა ვაშაძემ.

გარდა ამისა, ნაციონალურ მოძრაობაზე საუბრისას, ვაშაძე ამბობს, რომ მათ ოპოზიციაში "ორკვირიანი დომხალი" მოაწყვეს, რაც მაგალითია იმის რომ მძიმე მდგომარეობაში არიან. მისივე შეფასებით, პარტიაში ცოტა პოლიტიკოსი დარჩათ:

"ისევ იმავეს დაუბრუნდნენ, ყოველთვის უნდათ აზრზე მონოპოლია. პირველ ღამეს შეცდომა დაუშვეს, ვერ გაიაზრეს ეს პროცესი ფართო ჭრილში, დაიწყეს თავდასხმები ამ შეთანხმებაზე, ოღონდ თვითონაც იციან, რომ მაგარი შეთანხმება არის, განა არ იციან, უბრალოდ თავდასხმები ამაზე დაიწყეს".

ამასთან, სტრაგია აღმაშენებლის ლიდერი აცხადებს, რომ ნაციონალური მოძრაობა "გადამგდებ ძალად" ჩამოყალიბდა.