პარტია მოქალაქეების ლიდერის, ალეკო ელისაშვილის განცხადებით, მერის არჩევნებზე ნაციონალური მოძრაობის თავმჯდომარის, ნიკა მელიას კანდიდატს მხარს არ დაუჭერენ. ამის შესახებ მან რუსთავი 2-ის ეთერში ისაუბრა.

"ამ პროცესებში ნაციონალურმა მოძრაობამ გვაჩვენა ის, რაც ოდნავ მიგვავიწყდა, სინამდვილეში ეს არის მავნებლური პოლიტიკური ძალა. ახლა რა, ევროკავშირის გირაოს არ თანხმდებიან? არ ვეუბნებოდით ამას? სამი თვე რატომ აწვალეს ეს ქვეყანა? ის არ ხდება, რასაც ვამბობდით? არ ვამბობდი, რომ ყველა შემოვა, ყველას შემოსვლა უნდა და ეს გაჯიუტება უაზრობაა-თქო. რაში დავკარგეთ ნახევარი წელი?", — თქვა ელისაშვილმა.

მისი თქმით, ნაციონალურმა მოძრაობამ დაამტკიცა "რა მავნებლებიც არიან" და ენმ-ს არცერთი კანდიდატი არ უნდა იყოს "არცერთ თანამდებობაზე არასდროს", მათ შორის, არც თბილისის მერად.

"ვინც შემოვიდა იმ დღეს, დანარჩენი ოპოზიცია, რომ დახვდნენ და მონა-მონა ეძახეს, ახლა რომ ნაციონალური მოძრაობა შემოვა, ხომ არიან ღირსები, ყველანი დავხვდეთ და იგივე ვეძახოთ?",— აცხადებს ის.

ელისაშვილის განცხადებითვე, პარტიაში მიდის მსეჯლობა, რომ თბილისის მერობაზე საკუთარი კანდიდატურა დააყენოს, თუმცა როგორც ის ამბობს, ჯერ კარგად უნდა "აწონ-დაწონონ".

"არ ვიცი, ვერ ჩამოვყალიბდით, შეიძლება ვიყო მერობის კანდიდატი, შეიძლება არ ვიყო. ამაზე სერიოზულად ვფიქრობთ და მსეჯლობა მიდის. უნდა ავწონ-დავწონოთ კარგად. ყველამ ხომ ნახა, რომ ჩვენ არ ვცანცარებთ და სერიოზულ გადაწყვეტილებებს ვიღებთ. დიდი ალბათობით, თუ ვიქნები, მე ვიქნები, მერობის კანდიდატი ჩვენი პარტიისგან, ამას არ გამოვრიცხავთ", — აღნიშნა ელისაშვილმა.

არსებული ინფორმაციით, ოპოზიციის ნაწილის საერთო კანდიდატად განიხილება ნაციონალური მოძრაობის თავმჯდომარის, ნიკა მელიას კანდიდატურა. სტრატეგია აღმაშენებლის ლიდერი, გიორგი ვაშაძე აცხადებს, რომ პარტია ნაციონალური მოძრაობის კანდიდატს მხარს არ დაუჭერს. მისი თქმით, უნდა შეიქმნას მესამე, "მძლავრი მიზიდულობის ცენტრი", რომლითაც ხელისუფლების ცვლილების პროცესი დაიწყება.