ევროკავშირის ელჩი საქართელოში, კარლ ჰარცელი პარლამენტის თავმჯდომარეს, კახა კუჭავას შეხვდა. ჰარცელის განცხადებით, მათ შეხვედრაზე ოპოზიციასა და ქართულ ოცნებას შორის მიღწეული შეთანხმება განიხილეს.

"ეს იყო ჩემი პირველი შეხვედრა ახალ სპიკერთან. მივულოცე ეს მნიშვნელოვანი თანამდებობა. გვქონდა შესაძლებლობა უფრო დეტალურად განგვეხილა 19 აპრილის შეთანხმება და მისი შესრულება, რომელშიც პარლამენტს ძალიან მნიშვნელოვანი როლი ექნება.

როგორც ვიცით, პარლამენტში 2 პროექტია, რომელსაც განიხილავენ. ვფიქრობ, პირველ რიგში, უმნიშვნელოვანესია ის, რომ ამ საკითხზე დისკუსია წარიმართება პარლამენტში აპრილის შეთანხმების მიხედვით. არ ვაპირებ კომენტარი გავაკეთო პროექტებზე, თუმცა მართლაც მნიშვნელოვანია, რომ ამაზე იმუშავებს პარლამენტი, შედგება განხილვა პარტიებს შორის", — თქვა მან (ფორმულას თარგმანი).

ჰარცელმა აღნიშნა, რომ ახლა შეთანხმების გზის დასაწყისში ვართ, რომელიც მნიშვნელოვან რეფორმებამდე მიგვიყვანს.

6-თვიანი ბოიკოტის შემდეგ 27 აპრილს ოპოზიციის ნაწილი პარლამენტში მივიდა. 28 აპრილს ქართული ოცნებისა და ოპოზიციის შეხვედრის შემდეგ გადაწყდა, რომ ამნისტიის კანონპროექტის ორი ვერსია დარეგისტრირდებოდა. ოპოზიციის ლიდერების განცხადებით, მათ ვერსიაში საუბარია დაზარალებულის ნების გათვალისწინებაზე, ქართული ოცნებისაში კი — არა.

ევროპული საბჭოს პრეზიდენტის, შარლ მიშელის ახალ დოკუმენტს შვიდმა პოლიტიკურმა პარტიამ და ორმა დამოუკიდებელმა დეპუტატმა 19 აპრილს მოაწერა ხელი. ხელმოწერის ცერემონია პრეზიდენტის სასახლეში გაიმართა, რომელსაც ონლაინ დაესწრო შარლ მიშელიც.