გარემოს ეროვნული სააგენტოს ინფორმაციით, საქართველოში ამინდის გაუარესება და ნალექია მოსალოდნელი. როგორც სააგენტო წერს, დღეიდან წვიმა მოსალოდნელია დასავლეთ საქართველოში, ხოლო აღმოსავლეთ საქართველოში 6 მაისიდან:

"4 მაისს დღის მეორე ნახევრიდან დასავლეთ საქართველოში 5 მაისის დილამდე, ხოლო აღმოსავლეთ საქართველოში 6 მაისის დღის მეორე ნახევრამდე მოსალოდნელია წვიმა, ზოგან ძლიერი, შესაძლებელია ელჭექი, სეტყვა, ქარის გაძლიერება და ზღვაზე 2-3 ბალიანი ღელვა".

გარემოს ეროვნული სააგენტო მოსახლეობას აფრთხილებს, რომ მოსალოდნელმა ძლიერმა ნალექებმა საქართველოს მდინარეებზე შესაძლოა გამოიწვიოს წყლის დონეების მნიშვნელოვანი მატება, პატარა მდინარეებზე წყალმოვარდნები, ხოლო ქვეყნის მთიან ზონებში თოვლის ზვავების ფორმირება და მეწყრული პროცესების ჩასახვა — გააქტიურება.

AccuWeather-ის მიხედვით, თბილისში 4 მაისი უნალექოდ ჩაივლის და ჰაერის ტემპერატურა 26° ცელსიუსამდე გათბება.