მსოფლიო პატრიარქი, ბართლომეოს პირველი აცხადებს, რომ მეცნიერების მიერ შეთავაზებული მსახურება ღვთის საჩუქარია. ამის შესახებ მან ფორმულას ეთერში, კორონავირუსის საწინააღმდეგო ვაქცინაციაზე საუბრისას განაცხადა.

"გაკეთებული მაქვს ორივე აცრა. ეს იმას ნიშნავს, რომ მწამს აუცილებლობა მეცნიერებისა. მწამს იმის, რომ ჩვენ, ქრისტიანებმა უნდა მივიღოთ მეცნიერების მიერ შემოთავაზებული მსახურება, რომელიც არის ღვთის საჩუქარი", — განაცხადა ბართლომეოს პირველმა.

მან ისაუბრა ექიმებზეც და თქვა, რომ აუცილებელია მათი რჩევების გათვალისწინება.

"ძველი აღთქმა გვასწავლის, რომ პატივი უნდა მივაგოთ ექიმებს, რადგან ისინი ღვთის თანამოღვაწენი არიან, რომ მათი მსახურება მეტია, ვიდრე პროფესია [...] დღეს, პანდემიის პირობებში, არ შეიძლება არ გავითვალისწინოთ მედიცინის მუშაკთა რჩევები, მათი ფასდაუდებელი მსახურება და თავდადება და გამოვთქვათ კიდევაც მადლიერება მათ მიმართ. ისინი ხომ ავადმყოფებთან ერთად იტანჯებიან, ღამეებს ათენებენ, დღეებისა და კვირების განმავლობაში ოჯახის წევრებს ვერ ნახულობენ. ", — განაცხადა მსოფლიო პატრიარქმა.