TV პირველმა გაავრცელდა ინფორმაცია, რომ ნაციონალური მოძრაობის თავმჯდომარეს, ნიკა მელიას სამშაბათს, 4 მაისს ადვოკატები მოინახულებენ, ხოლო, ოთხშაბათს, 5 მაისს იგი, სავარაუდოდ, საპატიმროს ევროკავშირის გირაოს სანაცვლოდ დატოვებს. On.ge ინფორმაციის გადასამოწმებლად მელიას ადვოკატებსა და ევროკავშირის წარმომადგენლობის საქართველოს ოფისს დაუკავშირდა.

ევროკავშირის ოფისში ინფორმაციას არ ადასტურებენ. რაც შეეხება მელიას ინტერესების დამცველებს, ადვოკატი დიმიტრი საძაგლიშვილი მელიასთან ვიზიტს ადასტურებს, თუმცა, მისი სავარაუდო გათავისუფლების შესახებ ინფორმაციას უარყოფს.

"სამშაბათს ჩვენ შევდივართ, რა თქმა უნდა, მაგრამ, ეს არის ჩვეულებრივი ვიზიტი. თითქმის ყოველ დღე, მას ვხვდებით რუსთავის ციხის შენობაში.

რაც შეეხება რაღაცა დოკუმენტზე ხელმოწერას, მსგავსი რამ ბუნებაში არ არსებობს. ეგეთი პროცედურა, რომ გირაოზე წინმსწრებად თანხმობა გამოხატო, არ არსებობს. შესაბამისად, არც ამ მიზნით არ არის ჩვენი ვიზიტი დაგეგმილი რუსთავის მე-13 დაწესებულებაში", — განაცხადა საძაგლიშვილმა On.ge-სთან.

იგი ამბობს, რომ ხელისუფლებას მოუწევს მელიას გათავისუფლება, თუმცა როდის და რა მექანიზმით, ჯერჯერობით არ იცის.

"მე პირადად, დარწმუნებული ვარ, რომ ხელისუფლებას, მიუხედავად იმისა, რომ მას არ სურს, მოუწევს უახლოეს მომავალში ნიკა მელიას გათავისუფლება საპყრობილიდან. პოლიტიკური ტყვეობიდან. ეს როდის იქნება, კონკრეტული თარიღის თქმა არ შემიძლია.

ხელისუფლებამ დააპატიმრა და დარწმუნებული ვარ, მოუწევს ახლო მომავალში მისი გათავისუფლება. რა ფორმით გააკეთებს ამას, ჩვენთვის უცნობია", — ამბობს ადვოკატი.

გუშინ, 1-ელ მაისს ნიკა მელიასთან შესახვედრად რუსთავს ციხეში პარტია ლელოს თავმჯდომარე, მამუკა ხაზარაძე მივიდა. შეხვედრის შემდეგ მან განაცხადა, რომ ევროკავშირის გირაო უპრეცედენტოა და ამას მელია იაზრებს.

26 აპრილს თავად ნიკა მელიამ განაცხადა, რომ მზადაა ევროკავშირის გირაოს დათანხმდეს, თუ პარტიები 20 ივნისის შესახებ ამნისტიას გაითხოვენ.

გაიგეთ მეტი: