კომპანია სოკარის საქმიანობა საქართველოში უცვლელად ეფუძნება კორპორატიული სოციალური პასუხისმგებლობის 5 ძირითად სტანდარტს — ახალგაზრდების განვითარება, ქალთა უფლებების დაცვა, შშმ პირთა და ხანდაზმულთა მხარდაჭერა, შრომის უსაფრთხოება და ეკოლოგია. ამ მიმართულებების გასაძლიერებლად სოკარს არაერთი პროექტი აქვს განხორციელებული საქართველოში და ყოველი მათგანი შესრულებულია თანამედროვე ბიზნესის ძირითადი პრინციპის — გამჭვირვალობის დაცვით. სწორედ ამიტომ, საზოგადოებას მუდმივად მიეწოდება ინფორმაცია სოკარის მიზნებისა და ამა თუ იმ პროგრამის რეალიზებისთვის გამოყენებული რესურსების შესახებ.

კომპანიის განცხადებით, გარემოს დაცვის მიმართულებით უკვე გადადგმულია მთელი რიგი ნოვატორული და შთამბეჭდავი ნაბიჯი, რომელთა შორის განსაკუთრებით თვალსაჩინო ადგილი უკავია მზის პანელებით ენერგიის გამომუშავების პროგრამას.

ამ პროგრამის ფარგლებში, რამდენიმე კვირის წინ, სოკარის კიდევ ერთ მნიშვნელოვან ობიექტზე, თბილისის ზღვაზე განლაგებულ ავტოგასამართ სადგურზე, დამონტაჟდა მზის პანელები, რაც იმას ნიშნავს, რომ ამ ეტაპზე ეს უკვე მეორე ავტოგასამართი სადგურია თბილისში, რომელიც ოპერირებს მზის ენერგიის გამოყენებით.

მზის პანელების დაპროექტებისა და ავტოგასამართ სადგურებზე დამონტაჟების მიზნით, სოკარმა მოიწვია კომპანია Sonnenschmied-ის გამოცდილი კონსტრუქტორი-სპეციალისტები გერმანიიდან, რითაც უზრუნველყოფილი იქნა სამუშაოების უმაღლესი საერთაშორისო სტანდარტებით განხორციელება — პროექტში გამოყენებული თითოეულ კომპონენტი დამოწმებულია ევროკავშირის ერთიანი ბაზრისათვის აუცილებელი ხარისხის სერტიფიკატით.

კომპანიის განცხადებით, ავტოგასამართი სადგურების სახურავზე 200მ² ფართობზე განთავსებული მზის პანელების პიკური სიმძლავრე 39,6 კვტ სთ-ს შეადგენს, რაც წლის განმავლობაში იძლევა 48 ათასამდე კვტ/სთ ენერგიის გამომუშავების საშუალებას. ეს კი, თავის მხრივ, ნიშნავს, რომ ატმოსფეროში ნახშირორჟანგის წლიური გაფრქვევა 28,7 ტონით ნაკლები იქნება.

თბილისის ზღვისა და აღმაშენებლის ხეივანზე, ბოტანიკის ინსტიტუტთან განლაგებულ სოკარის ავტოგასამართ სადგურებზე მზის პანელებით გამომუშავებული ენერგია მოხმარებული იქნება ავტოგასამართი სადგურის მიერ, მათ შორის ელექტრომობილების დამტენის და Way Mart-ის საცალო ვაჭრობის ცენტრების მიერ.

კომპანია იკვლევს შესაძლებლობებს იმისათვის, რომ ახლო მომავალში, კიდევ უფრო მასშტაბური პროექტები განახორციელოს ამ მიმართულებით. საუბარია დამოუკიდებელ სიმძლავრეებზე, რომლებიც მოამარაგებენ სოკარის ავტოგასამართ სადგურებს მზისგან მიღებული ელექტროენერგიით. გარდა ამისა, სოკარის სამომავლო გეგმები ვარაუდობს მზის პანელების მეშვეობით ელექტრომობილების სწრაფი დამუხტვის ცენტრების შექმნასაც.

მათი განცხადებით, სიამაყით შეიძლება ითქვას, რომ საქართველოს ნავთობისა და გაზის სექტორში სოკარი არის პირველი კომპანია, რომელმაც დაიწყო ასეთი მასშტაბისა და მნიშვნელობის პროექტების განხორციელება, რაც კიდევ უფრო აახლოვებს ჩვენს ქვეყანას საერთაშორისო ეკოლოგიურ სტანდარტებთან ამ სფეროში.