ორ იუთუბერს, ჯოშ ფეილერ ლინსა და ლიშას ინდონეზიიდან დეპორტაცია ემუქრებათ. ამის მიზეზი კი ყალბი ნიღბის შესახებ გადაღებული ვიდეო გახდა. ვიდეოში ლიშა მაღაზიაში შესვლას პირბადის უქონლობის გამო ვერ ახერხებს. ამის შემდეგ ლინი მას სახეზე პირბადეს ახატავს და ლიშა მაღაზიაში შედის. ვიდეო Youtube-ზე 22 აპრილს აიტვირთა, თუმცა მოგვიანებით წაშალა.

ინდონეზიაში პირბადის ტარებასთან დაკავშირებით მკაცრი წესები მოქმედებს. პოლიციას წესების დარღვევის შემთხვევაში მოქალაქეების დაჯარიმების უფლება აქვს.

მიუხედავად იმისა, რომ იუთუბერებისთვის აღნიშნული შემთხვევა პირველი სამართალდარღვევაა, რადგანაც ვიდეომ საზოგადოების განსაკუთრებული ყურადღება მიიქცია, მათ პასპორტი ჩამოერთვათ და ბალიდან დეპორტაცია ემუქრებათ.

ლინმა ინსტაგრამზე ვიდეომიმართვა გაავრცელა, სადაც ორივე იუთუბერი ადვოკატთან ერთად მომხდარის გამო ბოდიშს იხდის.

"ამ ვიდეოს გადაღების მიზანი არ იყო უპატივცემულობის გამოხატვა ან სხვების წახალისება, რომ პირბადეები არ ეტარებინათ. მე ვიდეოებს ხალხის გასართობად ვიღებ, რადგანაც კონტენტის შემქმნელი ვარ და ხალხის გართობაზე ზრუნვა ჩემი სამუშაოა... გპირდებით, რომ ეს აღარ განმეორდება", — ამბობს ლინი ვიდეოში.

ინდონეზიაში კორონავირუსის მილიონნახევარზე მეტი შემთხვევაა დაფიქსირებული, გარდაცვლილთა რაოდენობა კი 40 000-ს აჭარბებს.