აშშ-ის ყოფილი პირველი ლედის, მიშელ ობამას, სადებიუტო ავტობიოგრაფიული წიგნი ქართულ ენაზე ითარგმნა.

წიგნს როგორ გავხდი ის, ვინც ვარ გამომცემლობა პალიტრა L გამოსცემს სერია "ლურჯი ოკეანის" ფარგლებში.

მიშელ ობამას მემუარები, ორიგინალური სახელწოდებით Becoming, 2018 წელს გამოიცა და უმალ იქცა ბესტსელერად. წიგნი, რომელშიც აშშ-ის 44-ე პრეზიდენტის ცოლი იხსენებს ცხოვრებისეულ გამოცდილებას, დაბრკოლებებს და პირველი ლედის რანგში ყოფნას, პირველ ორ კვირაში 2 მილიონ ეგზემპლარად გაიყიდა. გასული წლის ნოემბრის მონაცემებით კი, მთლიანობაში წიგნის 14 მილიონი ეგზემპლარია გაყიდული.

ნაწარმოების წარმატება გაიმეორა ბარაკ ობამას დაწერილმა მესამე წიგნმა, აღთქმული მიწა, რომელიც 2020 წელს, გამოცემიდან პირველივე დღეს თითქმის მილიონიანი ტირაჟით გაიყიდა.

ამერიკელების მიერ ყველაზე საყვარელ ქალად დასახელებულმა მიშელმა კი გასულ წელს პოდკასტების სერიის გამოშვებაც დაიწყო ურთიერთობებისა და მენტალური ჯანმრთელობის შესახებ.