საქართველოს ფინანსთა სამინისტროს საგამოძიებო სამსახურმა ერთი პირი დიდი ოდენობით BELUGA-ს, FINLANDIA-ს, NEMIROFF-ს და სხვა დასახელების უაქციზო არყის რეალიზაციის ბრალდებით დააკავა. უწყების პრესსამსახურის ინფორმაციით, პირის დასაკავებლად ოპერატიულ - სამძებრო და საგამოძიებო მოქმედებები ჩატარდა.

"გამოძიებით დადგენილია, რომ ბრალდებული, მისი კუთვნილი მაღაზიიდან, სისტემატურად ახდენდა მარკირებას დაქვემდებარებული სპირტიანი ალკოჰოლური სასმელების უაქციზოდ რეალიზაციას, რითაც, იგი თავს არიდებდა კანონით დადგენილი აქციზის გადასახადის სახელმწიფო ბიუჯეტში გადახდას," - აღნიშნულია უწყების პრესსამსახურის მიერ გავრცელებულ ინფორმაციაში.

გამოძიება საქართველოს სისხლის სამართლის კოდექსის მე-200 მუხლის მეორე პუნქტით მიმდინარეობს. ამ მუხლით აქციზური მარკის სავალდებულო დართვას დაქვემდებარებული დიდი ოდენობის საქონლის მარკის გარეშე გამოშვება, შენახვა, რეალიზაცია ან გადაზიდვა ისჯება თავისუფლების აღკვეთით 4-დან 6 წლამდე.