სტრატეგია აღმაშენებლის ლიდერის, გიორგი ვაშაძის განცხადებით, ამნისტია შეთანხმების ნაწილია, ამიტომ ერთი ნაწილის დარღვევის შემთხვევაშიც კი, შეიძლება, ქართულმა ოცნებამ შეთანხმება მთლიანად დარღვეულად ჩათვალოს. ამის შესახებ მან TV პირველის ეთერში ისაუბრა და ასე გამოეხმაურა მელიას განცხადებას, რის თანახმადაც, ის მზადაა, ევროკავშირის გირაოს დათანხმდეს, თუ ამნისტიას გაითხოვენ.

"ამნისტია არ არის მელიას პასუხისმგებლობა, ამნისტია არის ჩვენი, ვინც ხელი მოვაწერეთ, მათი პასუხისმგებლობა. ნებისმიერი მცდელობა, რომ პასუხისმგებლობა მისკენ გადაიტანოს ვინმემ, ეს არის ამორალური, არასწორი და არც უნდა გადაიტანოს არავინ. ეს აბსოლუტურად კარგად მაქვს გააზრებული, რომ მე როგორც პოლიტიკოსი ვიღებ ამ პასუხისმგებლობას. უფრო მეტიც, ციხეში მჯდომი ადამიანისთვის ნამდვილად წარმოუდგენლად მიმაჩნია, რომ ახლა განცხადება გააკეთოს, რომ ამნისტიით გამომიყვანეთო. არ მგონია, სწორი იყოს და მეც ასე მოვიქცეოდი.

მაგრამ მე ხომ ჩემი პასუხისმგებლობა მაქვს, როცა ამ საქმეს ვუყურებ, ამიტომ კიდევ ერთხელ ვამბობ, რომ გირაოს თუ დათანხმდება, ის 3 დღეში გამოვა, შემოვა პარლამენტში და იქ შეგვიძლია ამნისტიაზეც ერთად ვიმსჯელოთ, მაგრამ ამნისტია არის შეთანხმების ნაწილი და თუ ერთ ნაწილს დავარღვევთ ამ შეთანხმებისა, შეთანხმება შეიძლება მთლიანად დარღვეულად ჩაგვითვალოს ქართულმა ოცნებამ. ნამდვილად არ მინდა, ამდენი მიღწევები სხვა საკითხებში რაც გვაქვს, გადავყაროთ", — თქვა მან.

დოკუმენტში, რომელიც ევროპული საბჭოს პრეზიდენტის, შარლ მიშელის ინიციატივით შემუშავდა წერია, რომ მხარეებმა ხელმოწერიდან ერთი კვირის ვადაში, "პოლიტიზებულ მართლმსაჯულებად" აღქმულ ორ საკითხზე რეაგირება უნდა მოახდინონ ამნისტიის საშუალებით და/ან ისეთი ზომების მიღებით, რომელიც ანალოგიურ შედეგს გამოიღებს.

ამნისტიის საკითხს მოყვა არაერთი კითხვა იმაზე, თუ ვის შეეხება ეს კანონი. კერძოდ, სამოქალაქო საზოგადოებისა და ოპოზიციის ნაწილი წინააღმდეგია, რომ ის გავრცელდეს სამართალდამცავები უწყების წარმომადგენლებზეც, რომლებიც აქციის დაშლაში მონაწილეობდნენ. პარლამენტის თავმჯდომარის, არჩილ თალაკვაძის განცხადებით, ამნისტიის კანონი ზუსტად იმ პირობებით მიიღება, რაც შეთანხმებაშია. მისი თქმით, ქართულ ოცნებას ამ საკითხზე "არავითარი სუბიექტური ინტერესი" არ გააჩნია.

27 აპრილს, სამშაბათს, ოპოზიცია პარლამენტში შევა იმისთვის, რომ ამნისტიის შესახებ კანონი დაარეგისტრიროს. ამნისტია შეეხება ნაციონალური მოძრაობის თავმჯდომარეს, ნიკა მელიას. პროექტის დარეგისტრირების შემდეგ, ამავე დღეს პრეზიდენტი გიორგი რურუას შეწყალების აქტს გამოსცემს.

გაიგეთ მეტი:

• ჩემი პოზიციაა, რომ თუ ეს გადაწყვეტილება იქნება მიღებული, ამნისტია უნდა შეეხოს ყველას — კალაძე
• თავი შევიკავოთ წინასწარი დასკვნებისგან, ამნისტიის კანონზე უამრავი მცდარი ინტერპრეტაცია ვრცელდება — ვაშაძე
• საია მოუწოდებს პარტიებს, არ დააინიცირონ პროექტი, რომლითაც ამნისტია სამართალდამცავებსაც შეეხებათ
• ამნისტია არ ეხებათ ანგელოზებს, ამნისტია ეხებათ სავარაუდო დამნაშავეებს — ოხანაშვილი