ადამიანის უფლებათა ევროპულ სასამართლოში საქართველოდან ასარჩევი მოსამართლის კანდიდატურების შესარჩევად დღეიდან ახალი კონკურსი ცხადდება.

იუსტიციის სამინისტროს ინფორმაციით, კონკურსში მონაწილეობის მიღება შეუძლიათ 30 წლიდან 65 წლამდე ასაკის საქართველოს ქმედუნარიან მოქალაქეებს, რომლებიც სრულყოფილად ფლობენ ქართულს, ინგლისურს/ფრანგულს, ადამიანის უფლებათა ევროპულ კონვენციას, შესაბამის პრეცედენტულ სამართალს და აქვთ ამ სფეროში მუშაობის გამოცდილება.

კონკურსანტებს ასევე მოეთხოვებათ საერთაშორისო საჯარო სამართლის პრინციპებისა და საქართველოს კანონმდებლობის ცოდნა.

იუსტიციის სამინისტროს ინფორმაციით, კანდიდატი უნდა აკმაყოფილებდეს მაღალი სამოსამართლო თანამდებობის დასაკავებლად საქართველოს კანონმდებლობით დადგენილ მოთხოვნებს ან უნდა იყოს კომპეტენტური და აღიარებული სამართალმცოდნე; ჰქონდეს პროფესიით მუშაობის არანაკლებ ხუთწლიანი გამოცდილება და მაღალი მორალური და პროფესიული რეპუტაცია.

საბუთებისა და განაცხადების მიღება 2017 წლის 14 მარტამდე გაგრძელდება.

შესული განაცხადებიდან სამ კანდიდატურას სპეციალური სამთავრობო კომისია შეარჩევს, რომლის შემადგენლობაში იქნებიან:

  • საქართველოს იუსტიციის მინისტრი, კომისიის თავმჯდომარე;
  • საქართველოს საგარეო საქმეთა სამინისტროს წარმომადგენელი, კომისიის თავმჯდომარის მოადგილე;
  • საქართველოს მთავრობის საპარლამენტო მდივანი;
  • საქართველოს მთავარი პროკურატურის პროკურორი წარმომადგენელი;
  • საქართველოს უზენაესი სასამართლოს მოსამართლე წარმომადგენელი;
  • თბილისის სააპელაციო სასამართლოს მოსამართლე წარმომადგენელი;
  • ქუთაისის სააპელაციო სასამართლოს მოსამართლე წარმომადგენელი;
  • საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის წარმომადგენელი;
  • საქართველოს სახალხო დამცველი ან მისი წარმომადგენელი;
  • საქართველოს ადვოკატთა ასოციაციის წარმომადგენელი;
  • საქართველოს იურიდიული ფირმების ასოციაციის („სიფა“) წარმომადგენელი;
  • სსიპ „ივანე ჯავახიშვილის სახელობის თბილისის სახელმწიფო უნივერსიტეტის“ იურიდიული ფაკულტეტის დეკანი;
  • კოალიციის − „დამოუკიდებელი და გამჭვირვალე მართლმსაჯულებისათვის“ − წარმომადგენელი.

აღნიშნული კომისიის შემადგენლობა კიდევ უფრო გაფართოვდა წინა კონკურსთან შედარებით, ხოლო კანდიდატებისათვის საგამოცდო ეტაპები დარჩა იგივე.

დაინტერესებულ კანდიდატებს განაცხადის ნახვა და კანდიდატურის დაყენება შეუძლიათ იუსტიციის სამინისტროს საიტსა და საჯარო სამსახურის ბიუროს ვებგვერდზე.