უკრაინის საგარეო საქმეთა მინისტრის, დმიტრო კულებას განცხადებით, საქართველო უკრაინის მეგობარია და მათ ყოველთვის აქვთ თბილისის იმედი, ისევე როგორც თბილისს შეუძლია ჰქონდეს მათი იმედი.

"უკრაინასა და საქართველოს მრავალი საკითხი აქვთ განსახილველი, ჩვენ ვართ მეგობარი ქვეყნები, ვისაუბრეთ ორმხრივ დღის წესრიგზე, მივესალმები საქართველოს მთავრობის გადაწყვეტილებას, რომ დააბრუნოს საქართველოს ელჩი კიევში. განვიხილეთ ჩვენი ევროატლანტიკური ინტეგრაციის საკითხი და უსაფრთხოების მხრივ სიტუაცია შავი ზღვის რეგიონში. ვისაუბრეთ საქართველოსა და უკრაინის ევროპულ მისწრაფებებსა და იმაზე, თუ როგორ შეგვიძლია უკეთ დავიცვათ ჩვენი ქვეყნებისა და ეკონომიკების ინტერესები ევროკავშირთან დიალოგის პროცესში. ასევე, განვიხილეთ ერთობლივი საქმიანობის სამომავლო გეგმები, ჩვენი ტერიტორიული ინტეგრაციისა და სუვერენიტეტის დაცვის მიზნით. სამწუხაროდ, ჩვენს ქვეყნებს მძიმე გამოცდილება გვაქვს რუსეთის მიერ ტერიტორიების ოკუპაციის მხრივ. როდესაც საქართველოსა და უკრაინის NATO-ში ინტეგრაციაზე ვსაუბრობთ, იქვე განვიხილავთ, თუ როგორ შეუძლია ჩვენს ქვეყნებს რუსეთისგან თავდაცვა. ჩემს კოლეგას მოვახსენე უკრაინაში რუსეთის საზღვართან არსებული სიტუაციის შესახებ. საქართველო მეგობარია და ყოველთვის გვაქვს თბილისის იმედი და თბილისს შეუძლია ჰქონდეს ჩვენი იმედი", — განაცხადა კულებამ [იმედის თარგმანი].

საქართველოს საგარეო საქმეთა მინისტრი ბუქარესტში უკრაინელ კოლეგასთან ერთად რუმინეთი-პოლონეთი-თურქეთის სამმხრივ მინისტერიალში იღებს მონაწილეობას, რომლის ფარგლებშიც განხილულ იქნება რეგიონალურ უსაფრთხოებასთან და საქართველოს და უკრაინის NATO-ში ინტეგრაციასთან დაკავშირებული საკითხები.