ლიეტუვის საგარეო საქმეთა ყოფილი მინისტრი, ლინას ლინკევიჩუსი ამბობს, რომ საქართველომ და უკრაინამ ნატოს წევრობის პერსპექტივის მკაფიო დადასტურება უნდა მიიღონ. ამის შესახებ მან ტვიტერზე დაპოსტა.

"რუსეთმა ახლახან კიდევ ერთხელ გამოავლინა საკუთარი "გამჭრიახობა, თითქოს უკრაიანამ დონბასში სიტუაცია ნატოში გაწევრიანების სამოქმედო გეგმის, MAP-ს მისაღებად გაამწვავა. კრემლის ყველა ამ "მანევრის" შემდეგ, ორივემ —უკრაინამაც და საქართველომაც — MAP და ნატოს წევრობის პერსპექტივის მკაფიო დადასტურება უნდა მიიღონ", — წერს ლინკევიჩუსი.

უკვე რამდენიმე კვირაა რუსეთ-უკრაინის საზღვრებთან დაძაბულობაა. ანექსირებულ ყირიმში რუსეთმა სამხედრო ძალები გაზარდა. ადგილზე მინიმუმ 80 000 ჯარისკაცი, ათასობით ტანკი და საბრძოლო მანქანა განალაგეს.

კიევმა მოსკოვი გასული წლის ივლისში გაფორმებული ცეცხლის შეწყვეტის შესახებ შეთანხმების დარღვევაში დაადანაშაულა, კრემლმა კი უკრაინას პროვოკაციების მოწყობაში დასდო ბრალი.

ბოლო ინფორმაციით, 22 აპრილს რუსეთის თავდაცვის სამინისტრომ უკრაინის საზღვრებიდან ჯარების გაყვანის შესახებ განაცხადა. გამოცემა ტასის ცნობით, რუსეთის ფედერაციამ სამხრეთ და დასავლეთის რაიონებში მოულოდნელი სამხედრო შემოწმების დასრულება გადაწყვიტა. თავდაცვის მინისტრ სერგეი შოიგუს განცხადებით, ყველა მიზანი მიღწეულია. მისივე თქმით, სამხედროების გაყვანა, რომლებიც ოკუპირებულ ყირიმსა და უკრაინის საზღვრებთან წვრთნებს ატარებდნენ, 23 აპრილს დაიწყება.