კულტურის მინისტრი თეა წულუკიანი აცხადებს, რომ მსახიობმა ბესო ზანგურმა, რომელსაც ყოფილი ცოლი, ნინუცა მაყაშვილი ოჯახში ძალადობაში ადანაშაულებს, სასწრაფოდ უნდა დატოვოს თეატრი. ორდღიანი დუმილის შემდეგ მინისტრი ამბობს, რომ სხვა არაფრის გაკეთება შეუძლია, რადგან არანაირი ბერკეტი არ აქვს, გადააყენოს მსახიობი.

"მივიჩნევ, რომ შექმნილი ვითარებიდან გამომდინარე, არა მხოლოდ ერთმა მხარემ, არამედ მეორე მხარემაც უნდა ითანამშრომლოს გამოძიებასთან. ამ შემთხვევაში ვგულისხმობ ბატონ ბესო ზანგურს და კარგი იქნება თუ ამასობაში ის დღესვე, სასწრაფოდ დატოვებს თეატრს. იმიტომ, რომ მე მეტი, მოწოდების არდა, არაფრის გაკეთება არ შემიძლია, რადგან როგორც იცით, კულტურის მინისტრს, არა აქვს არანაირი ბერკეტი იმისა, რომ მსახიობი დააყენოს", — განაცხადა მან.

ამავდროულად, მინისტრი ამბობს, რომ არ გეგმავს რუსთაველის თეატრის დასის ხელმძღვანელის, რობერტ სტურუას სამსახურიდან გათავისუფლებას. მეტიც, ამბობს, რომ სტურუას ქვეყანაში მხოლოდ ერთი ბადალი ჰყავს და მასზე თავდასხმები უნდა შეწყდეს. კითხვაზე, მიიჩნევს თუ არა სტურუას განაცხადს ძალადობის წახალისებად, მინისტრი ამბობს, რომ ამ თემაზე საკმარისად ისაუბრა.

"ბატონ რობერტ სტურუასთან დაკავშირებით, მე პირდაპირ გეტყვით როგორც კულტურის მინისტრი, რომ მისი გათავისუფლება არ იგეგმება. ასევე, გაცხადდა მისივე გადაწყვეტილება, რომ ის წასვლას არ აპირებს და ეს არის ის ადამიანი, რომელსაც დამეთანხმებით, რომ ამ ქვეყანაში მხოლოდ ერთი ბადალი თუ ჰყავს და ჩვენ მას, პირველ რიგში, მსახიობებმა, ჟურნალისტებმა და მინისტრებმა უნდა მივცეთ შესაბამისი საშუალება, რომ იმუშავოს და იმოღვაწეოს, იმიტომ, რომ ეს არის მისი საქმე. შესაბამისად, კარგი იქნება თუ შევწყვეტთ მასზე თავდასხმებს", — განცხადა წულუკიანმა.

მინისტრმა განაცხადა ისიც, რომ ძალადობაზე საუბარია არასდროსაა გვიან და ნინუცა მაყაშვილმა უნდა ითანამსრომლოს საგამოძიებო ორგანოებთან.

მას შემდეგ, რაც მსახიობმა და ტელეწამყვანმა, ნინუცა მაყაშვილმა ყოფილი ქმრის, მსახიობ ბესო ზანგურის მხრიდან ოჯახში ძალადობაზე ისაუბრა, სტურუა ზანგურს გამოესარჩლა. მან მაყაშვილის განცხადება საბჭოთა კავშირის მიერ 1937 წელს დაწყებულ პოლიტიკურ რეპრესიებს შეადარა და ჰომოფობიური და მიზოგინური განცხადებებიც გააკეთა.

საზოგადოების კრიტიკის შემდეგ, რუსთველის თეატრმა გააუქმა რობერტ სტურუას სპექტაკლის ჩვენება, რომელშიც ბესო ზანგური მონაწილეობს.

"დამშვიდდით, თატრიდან არ მივდივარ! გამაგდეთ და წავალ! მხოლოდ მაშინ! მიყვარხართ ქართველებო!" — დაწერა სტურუამ სპექტაკლის გაუქმების მეორე დღეს.

მსახიობი და ტელეწამყვანი ნინუცა მაყაშვილი ყოფილ ქმარს, რუსთაველის თეატრის მსახიობს, ბესო ზანგურს ოჯახში ძალადობაში ადანაშაულებს. მაყაშვილმა განაცხადა, რომ ყოფილი ქმარი მასზე ფიზიკურად ძალადობდა ორსულობის დროსაც.

"არ მახსოვს რა იყო მიზეზი, მაგრამ მახსოვს, რომ ეს ყველაფრი გააკეთა თავისი ოჯახის წევრების წინ და მე ვიყავი ორსულად. ხელის აღებაც არ იყო. ანუ, რეალურად, ძალიან [მცემა]", — განაცხადა მან.

ბესო ზანგური ყოფილ ცოლზე ძალადობას უარყოფს და აცახდებს, რომ მზად არის გამოძიებას კითხვებზე პასუხები გასცეს.

"დაიწყონ გამოძიება, მოხარული ვიქნები რომ გამოძიებას გავცე პასუხები. [...] მანამდეც მყოლია ცოლი, ნინუცა მაყაშვილამდე და მის მერეც, ახლაც მყავს. არცერთი ასეთ რაღაცას არც იგონებს, არც ადასტურებს", — აცხადებს ის რუსთავი 2-თან.

• ბესო ზანგურის მტკიცებით, ძალადობა მისთვის წითელი ხაზია, რომელსაც არასდროს გადაკვეთს
• ზანგურის აზრით, მაყაშვილისადმი სოლიდარობა და მისი კრიტიკა სტურუასა და თეატრზე თავდასხმაა

საჯარო განცხადების შემდეგ, ნინუცა მაყაშვილი შსს-ში გამოკითხვაზე დაიბარეს.

ამავე თემაზე:

• პროტესტის ნიშნად, აღარ ვაპირებ ბესო ზანგურთან ერთად სცენაზე დგომას — თამთა ინაშვილი
• "რეპრესიები!" — რობერტ სტურუა ბესო ზანგურზე ნინუცა მაყაშვილის განცხადებას ეხმაურება
• "რუსთაველის თეატრში ხელს აფარებენ მოძალადეებს" — დათა თავაძე ნინუცა მაყაშვილს სოლიდარობას უცხადებს
• ჩვენ ყველამ რაღაც დავაშავეთ, საზოგადოების პრობლემაა, რომ ნინუცა ამაზე არ ლაპარაკობდა — ნინო კასრაძე
• ბესო ზანგური არის, იყო და იქნება მუდამ მოძალადე — რუსკა მაყაშვილი
• ძალადობის ყველაზე დიდი მანქანა მუშაობს თეატრის შიგნით, ჩემი მხარდაჭერა ნინუცა მაყაშვილს — ანა სანაია
• როგორც რუსთაველის თეატრის მსახიობი, სოლიდარობას ვუცხადებ ქალებს და ვგმობ ძალადობას და მოძალადეებს — ჟორდანია