დეპუტატი შალვა კერესელიძე აცხადებს, რომ ქართული ოცნების გამარჯვებაში დიდი როლი ჰქონდა ექსპრემიერ გიორგი გახარიას.

"ქართული ოცნების წვლილი ამაში [არჩევნებში გამარჯვებაში] არის, მაგრამ, ასევე, ძალიან დიდი წვლილია ბატონი გიორგი გახარიასი, ის პროცენტი, რაც აიღო ქართულმა ოცნებამ, ხომ მეთანხმებით, არა?!", — ამბობს კერესელიძე.

იგი, ასევე, ამბობს, რომ მიუხედავად იმისა, რომ მაჟორიტარ დეპუტატად ქართულმა ოცნებამ წარადგინა, მისი გამარჯვება მცხეთა-მთიანეთის რეგიონში მთლიანად პარტიის დამსახურება არ არის.

"მე პარტია ქართული ოცნების მხრიდან ვიყავი წარდგენილი, როგორც მაჟორიტარი დეპუტატი, მაგრამ, ეგ სულაც არ ნიშნავს იმას, რომ მე რახან გავიმარჯვე მცხეთა-მთიანეთის რეგიონში, ეს არის მთლიანად ქართული ოცნების დამსახურება", — ამბობს კერესელიძე.

კერესელიძე ერთ-ერთია იმ 6 დეპუტატს შორის, რომლებმაც ქართული ოცნება დატოვეს და ყოფილი პრემიერმინისტრს, გიორგი გახარიას "პარტიის მშენებლობის ახალ ეტაპზე" უერთდებიან.

გიორგი გახარიამ პრემიერმინისტროის თანამდებობა 18 თებერვალს დატოვა და ამის მიზეზად ნაციონალური მოძრაობის თავმჯდომარის, ნიკა მელიას საქმეზე ქართული ოცნების გუნდში აზრთა სხვადასხვაობა დაასახელა.

გადადგომის შემდეგ მან პირველი საჯარო კომენტარი ჟურნალისტებთან 22 მარტს გააკეთა და თქვა, რომ არსად წასვლას არ აპირებს და პოლიტიკაში რჩება. რამდენიმე საათში იმავე შინაარსის წარწერით მან ოფიციალურ ფეისბუქგვერდზე ფოტო გამოაქვეყნა. იმავე საღამოს კი მან ტვიტერზე დაპოსტა, რომ პოლიტიკური დღის წესრიგის შექმნაზე მუშაობს.

გაიგეთ მეტი: