ქართული ოცნების დეპუტატის, სოზარ სუბარის განცხადებით, ყოფილი პრემიერმინისტრის, გიორგი გახარიას წასვლის წუთიდან იცოდნენ, რომ მმართველი პარტიის ექვსი უკვე ყოფილი დეპუტატი მიდიოდა. მისი თქმით, ამის შესახებ ღიად არ ლაპარაკობდნენ, რადგან არ იქნებოდა "სწორი და ლამაზი".

"რა დღესაც გიორგი გახარია გავიდა, იმ წუთიდან ვიცოდით, ბუნებრივია და სხვათა შორის, თითონაც არ მალავდნენ, რომ ეს ექვსეული მიდიოდა, თუმცა ამაზე ღიად არ ვლაპარაკობდით, სანამ თითონ განცხადებას არ გააკეთებდნენ, რაღაც არც იქნებოდა სწორი და ლამაზი. მაგრამ თვითონ ფორმა, მიუხედავად იმისა, რომ ყველა მათგანთან მაქვს კავშირი და დიდიხნიანი ურთიერთობა მაკავშირებს, მაგრამ, რომ გითხრათ, გამიხარდა, ნამდვილად ასე არ არის, მიუხედავად იმისა, რომ მოულოდნელი არ ყოფილა. მაგრამ ძალიან არასერიოზული იყო ის განცხადებები, რაც ზოგიერთმა მათგანმა გააკეთა, განსაკუთრებით, ბექა ლილუაშვილმა", — თქვა მან POSTV-ის ეთერში.

ქართული ოცნების 6 დეპუტატი მმართველ პარტიას ტოვებს და ექსპრემიერ გიორგი გახარიას უერთდება. "ოცნებიდან" მიდიან: გიორგი ხოჯევანიშვილი, მიხეილ დაუშვილი, ანა ბუჩუკური, ალექსანდრე მოწერელია, ბექა ლილუაშვილი და შალვა კერესელიძე. მათი თქმით, გადადიან გახარიას "პარტიის მშენებლობის ახალ ეტაპზე". ამის შესახებ მათ პარლამენტში გამართულ ბრიფინგზე განაცხადეს და დასძინეს, რომ საქმიანობას გააგრძელებენ, როგორ დამოუკიდებელი დეპუტატები.