ქართული ოცნების უკვე ყოფილი დეპუტატის, ბექა ლილუაშვილის განცხადებით, დღეს მმართველი პარტიის დღის წესრიგი ხალხის საჭიროებებს აღარ შეესაბამება, ამიტომ პარტიიდან წასვლის გადაწყვეტილება მიიღო.

"ცხადია, მე ვდგავარ ჩემი თანამოაზრეების, ჩემი თანაგუნდელების გვერდით და ჩემთვის, როგორც პარლამენტის წევრისთვის, ქართველი ხალხისა და ქართული სახელმწიფოს წინაშე აღებული პასუხისმგებლობის ფარგლებში, ეს არის უალტერნატივო გადაწყვეტილება. ჩვენ რამდენიმე თვეა უკვე ვაკვირდებით რადიკალიზაციით გაჯერებულ პოლიტიკურ დღის წესრიგს, მაშინ, როცა თითოეული ჩვენგანის ენერგია უნდა იყოს მიმართული ჩვენი მოქალაქეების ყოველდღიურ სოციალურ, ეკონომიკურ, ჯანდაცვის გამოწვევებზე და სამწუხაროდ, ეს ასე არ ხდება.

ამ ადამიანებმა აღარ იციან, როგორ მიგვანიშნონ იმაზე, რომ მათთვის მთავარი პრობლემა დღეს არის გაზრდილი სიღარიბე, უმუშევრობა, პანდემია და არ აინტერესებთ ძალაუფლების შენარჩუნებისა თუ მოპოვებისთვის გაჩაღებული დოღი. სწორედ ამიტომ, მიმაჩნია, რომ დღეს, რადიკალიზაციის მსგავსი ხარისხის პირობებში, ქართული ოცნების, როგორც ხალხის მიერ არჩეული პოლიტიკური ძალის დღის წესრიგი, აღარ შეესაბამება ამავე ხალხის საჭიროებებს და მიზნებს, სწორედ ამიტომ მივიღე ეს გადაწყვეტილება, რომ დავტოვო პარტია", — თქვა მან.

ქართული ოცნების 6 დეპუტატი მმართველ პარტიას ტოვებს და ექსპრემიერ გიორგი გახარიას უერთდება. "ოცნებიდან" მიდიან: გიორგი ხოჯევანიშვილი, მიხეილ დაუშვილი, ანა ბუჩუკური, ალექსანდრე მოწერელია, ბექა ლილუაშვილი და შალვა კერესელიძე. მათი თქმით, გადადიან გახარიას "პარტიის მშენებლობის ახალ ეტაპზე". ამის შესახებ მათ პარლამენტში გამართულ ბრიფინგზე განაცხადეს და დასძინეს, რომ საქმიანობას გააგრძელებენ, როგორ დამოუკიდებელი დეპუტატები.