პარლამენტის თავმჯდომარის, არჩილ თალაკვაძის თქმით, ერთადერთი შესაძლებლობა, რომ პარტია გირჩმა იმსჯელოს მისთვის სასურველ რეფორმებზე, არის მათი პარლამენტში შესვლა. თალაკვაძემ აღნიშნა ისიც, რომ დასაფასებელია გირჩის მზაობა, ხელი მოეწერათ შეთანხმების დოკუმენტზე, მედიაციის მეორე რაუნდზე.

"ვფიქრობ, დასაფასებელია ის პოზიცია რომელიც მათ დააფიქსირეს დიალოგის ბოლო რაუნდში. მათ პირდაპირ თქვეს, რომ მზად იყვნენ ხელმოსაწერად დოკუმენტის, რაც ვფიქრობ, რომ იყო სწორი გადაწყვეტილება.

რაც შეეხება ამ წამოყენებულ საკითხებს, ეს შვიდი პუნქტი და შეიძლება, მეტი პუნქტიც აქვს ასეთი, ეს არის გირჩის დღის წესრიგი. გირჩის, როგორც პოლიტიკური პარტიის პროგრამა. ამ პროგრამით ისინი გამოვიდნენ არჩევნებში. ყველამ ვნახეთ, თუ რამდენმა მოქალაქემ დაუჭირა მხარი ამას. ამიტომ, ერთადერთი შესაძლებლობა, რომ გირჩმა იმსჯელოს თავის სასურველ რეფორმებზე, ეს არის პარლამენტში ყოფნა და პარლამნეტში დისკუსია", — განაცხადა არჩილ თალაკვაძემ.

12 აპრილს პარტია გირჩმა წარადგინა 7 პუნქტი, რომელთაგან ერთ-ერთის სრულყოფილად გადაწყვეტის პირობის მიღების შემთხვევაში პარლამენტში შევლენ.

ეს პუნქტებია:

  1. ყველა შემდგომი საპარლამენტო არჩევნები ჩატარდება სრულად პროპორციული სისტემით და ბუნებრივი ბარიერით;
  2. კერძო საშუალო განათლება (კერძო სკოლები) სრულად გათავისუფლდება სახელმწიფო რეგულირებებისგან;
  3. რაიონული პოლიციის შერიფები აირჩევიან პირდაპირი წესით მოსახლეობის მიერ;
  4. პირველი ინსტანციის მოსამართლეები აირჩევიან პირდაპირი წესით ხალხის მიერ და ბრალდებულს ექნება უფლება, თავად აირჩიოს, რომელი მოსამართლე გაასამართლეს მას, არჩეული თუ დანიშნული;
  5. ქვეყანაში დაშვებული იქნება მულტისავალუტო რეჟიმი;
  6. რესტიტუცია — ოპოზიციასთან შეთანხმებული პუნქტების შესაბამისად;
  7. მოხდება მარიხუანის სრული ლეგალიზაცია.

გაიგეთ მეტი: