მთავრობამ დღეს $500 მილიონიანი ევრობონდების გამოშვებაზე განაცხადი გააკეთა, რაც ნიშნავს იმას, რომ საქართველო ახალ საგარეო ვალს იღებს. ვალის აღებით ბიუჯეტის ის დეფიციტი შეივსება, რომელიც გასულ კვირაში 2011 წელს გამოშვებული ევროობლიგაციების გადაფარვით წარმოიშვა. როგორც ცნობილი გახდა, ახალ $500-მილიონიან ევროობლიგაციებს საქართველო 5 წლის ვადით გამოუშვებს. აღსანიშნავია, რომ 2011 წელს განთავსებული ფასიანი ქაღალდები 10 წლის ვადით იყო გამოშვებული.

ფინანსთა სამინისტროს ცნობით, $500-მილიონიანი ფასიანი ქაღალდების გამოშვების პროცესი საკმაოდ დიდი ხანია მიმდინარეობს, რასაც თან ახლავს კონფიდენციალურობის გარკვეული სტანდარტები. ფინანსთა მინისტრის მოადგილის, ნიკოლოზ გაგუას განცხადებით, მიმდინარეობს გლობალურ ინვესტორებთან შეხვედრები და აღნიშნული პროცესი მიმდინარე კვირაში დასრულდება.

რაც შეეხება საპროცენტო განაკვეთს, მისი მოცულობა ამ ეტაპისთვის უცნობია. შეგახსენებთ, რომ საერთაშორისო ფინანსურ ბაზრებზე არსებული ვითარების გათვალისწინებით, საქართველოს მთავრობა მნიშვნელოვნად დაბალი საპროცენტო განაკვეთის დაფიქსირებას ელოდება. აღსანიშნავია, რომ 2011 წელს 500 მილიონი დოლარი 6,875%-ად ვისესხეთ.