პარტია მოქალაქეების ერთ-ერთი ლიდერის, ალეკო ელისაშვილის შეფასებით, პრეზიდენტი, სალომე ზურაბიშვილის მოხსენება ძალიან ზოგადი იყო.

"ძალიან ზოგადი იყო, რასაც ვუსმენდი. ჯერ ერთი, მეგონა, რომ უფრო მეტს ისაუბრებდა და 15 წუთიანი მოხსენება ჰქონდა, არადა ქვეყანაში არსებული ვითარება გაცილებით მეტს მოითხოვს, თუნდაც უფრო ვრცელ მოხსენებას.

როგორც ყველაფერში ჩვენი პრეზიდენტი იყო ძალიან ზოგადი პოლიტიკურ კრიზისთან დაკავშირებითაც. კი ბატონო, ფასილიტატორებს მადლობას უხდიდა, მაგრამ ის მაინც რატომ არ თქვა, რომ თვითონ უნდა იყოს წესით პირველი ფასილიტაოტირ ამ ქვეყანაში. უცხოელებს კი არ უნდა უხდიდეს მადლობას, თავის თავს უნდა აკრიტიკებდეს, რომ რატომ არ არის პრეზიდენტის სასახლე ის სივრცე, სადაც უშუალოდ პრეზიდენტი წარმართავს მედიაციას ან მოლაპარაკების პროცესს", — თქვა მან.

დღეს საქართველოს პრეზიდენტმა, სალომე ზურაბიშვილმა პარლამენტში ყოველწლიური მოხსენება წარადგინა. მან ისაუბრა ქვეყანაში მიმდინარე პოლიტიკურ და ეკონომიკურ კრიზისზე. შეაფასა ქართულ ოცნებასა და ოპოზიციას შორის რამდენჯერმე ჩაშლილი მოლაპარაკებების პროცესი და აღნიშნა, რომ არცერთ მხარეს არ ეყო გამბედაობა შეთანხმების მისაღწევად.