პარლამენტში განათლებისა და მეცნიერების კომიტეტის თავმჯდომარედ ქართული ოცნების დეპუტატის, შალვა პაპუაშვილის არჩევის შედეგ პარტია მოქალაქეების ერთ-ერთმა ლიდერმა, ლევან იოსელიანმა თქვა, რომ ეს ის შემთხვევაა, როცა მან და პარტიის ლიდერმა, ალეკო ელისაშვილმა პაპუაშვილის კანდიდატურას მხარი დაუჭირეს.

"ბატონო შალვა, მინდა მოგილოცოთ კომიტეტის თავმჯდომარის თანამდებობაზე არჩევა. ეს ის შემთხვევაა, როდესაც მეც და ბატონმა ალეკო ელისაშვილმაც მხარი დავუჭირეთ თქვენს კანდიდატურას. მინდა ყველამ იცოდეს, რომ მე რაღაც პერიოდი მომიწია ბატონ შალვასთან მუშაობა საარჩევნო კოდექსთან დაკავშირებით და მე დავრწმუნდი ამ ადამიანის კეთილსინდისიერებაში, პატიოსნებასა და კვალიფიკაციაში. ჩემთვის არ აქვს მნიშვნელობა რომელი პარტიის კეთილსინდისიერი, კვალიფიციური და პატიოსანი ადამიანი ემსახურება ჩვენი ქვეყნის ინტერესებს. სწორედ ამიტომ დავუჭირე მე მას მხარი. არ ვიცი კიდევ ვინმეს თუ ექნება იმის ფუფუნება, რომ ოპოზიციონერმა სპიკერმა დაუჭიროს მხარი, მაგრამ თქვენ, ბატონო შალვა, ნამდვილად გაგიმართლათ", — განაცხადა იოსელიანმა.

პაპუაშვილი განათლებისა და მეცნიერების კომიტეტის თავმჯდომარის თანამდებობაზე წარდგენილი ერთადერთი კანდიდატი იყო. მისი დანიშვნის მომხრე 83 დეპუტატი იყო, წინააღმდეგი — არავინ.