მთავარი პროკურატურის განცხადებით, 15 თებერვალს, დიდი ოდენობით თანხების მოტყუებით დაუფლების ფაქტზე, სისხლის სამართლის პასუხისგებაში მისცა შპს ცენტრ-პოინტ ჯგუფის დამფუძნებელი და დირექტორი, მაია რჩეულიშვილი. მასთან ერთად, სსკ-ის 180-ე მუხლის მესამე ნაწილის ბ ქვეპუნქტის მიხედვით, ბრალი წარედგინა შპს დიღომი დისთრიქთ აფართმენთის საორგანიზაციო განყოფილების ყოფილი უფროსს, ქეთევან ჟორდანიას.

მაია რჩეულიშვილისა და ქეთევან ჟორდანიასთვის წარდგენილი ბრალდება, დამტკიცების შემთხვევაში, სასჯელის სახედ ითვალისწინებს თავისუფლების აღკვეთას ექვსიდან ცხრა წლამდე ვადით.

გამოძიების ვერსიით, 2014 წლის ბოლოს, შპს დიღომი დისთრიქთ აფართმენთის დირექტორი, მაია რჩეულიშვილი, მენაშენეთა კუთვნილი დიდი ოდენობით თანხების მოტყუებით დასაუფლებლად, შეუთანხმდა ამავე საზოგადოების საორგანიზაციო განყოფილების უფროსს, ქეთევან ჟორდანიას, რათა ეს უკანასკნელი დაკავშირებოდა შპს დიღომი დისთრიქთ აფართმენთის მშენებარე ობიექტების მენაშენეებს და იმ მოტივით, თითქოს მათი ქონების საჯარო რეესტრში რეგისტრაციისთვის და მშენებარე ობიექტზე კომუნიკაციების შესაყვანად საჭირო იყო დამატებითი თანხების მობილიზაცია, მოეთხოვა თითოეული მათგანისთვის 1 870 ლარის გადახდა. როგორც პროკურატურა ამტკიცებს, მაია რჩეულიშვილის დავალების შესაბამისად, ქეთევან ჟორდანია დაუკავშირდა ობიექტის მენაშენეებს და 2014-2016 წლების განმავლობაში შეატანინა ჯამში 258 092 ლარი, საიდანაც მიზნობრიობით, საჯარო რეესტრში რეგისტრაციისთვის გადარიცხული იქნა მხოლოდ 21 915 ლარი, ხოლო დარჩენილ თანხას - 236 177 ლარს ქეთევან ჟორდანიას დახმარებით დაეუფლა მაია რჩეულიშვილი.

ცენტრ პონიტ ჯგუფის დამფუძნებლისა და დირექტორის, მაია რჩეულიშვილის მიმართ თბილისის საქალაქო სასამართლოში იხილება ორი სისხლის სამართლის საქმე, ე.წ. აჭარის მაგნოლიას ეპიზოდი.

როგორც პროკურატურა აცხადებს, მაია რჩეულიშვილს ბრალდების ერთ-ერთ სისხლის სამართლის საქმეზე აღკვეთის ღონისძიებად შეფარდებული ჰქონდა გირაო 250 000 ლარის ოდენობით და მისი ბრალდების სისხლის სამართლის საქმე 2014 წლის ნოემბერში წარიმართა თბილისის საქალაქო სასამართლოში.

პროკურატურის ცნობით, მაია რჩეულიშვილმა კვლავ განაგრძო მოქმედება მენაშენეთა კუთვნილი თანხების მოტყუებით დასაუფლებლად, ხოლო ეპიზოდი, რის გამოც მას წარედგინა ბრალდება, ჩადენილია გირაოში ყოფნის პერიოდში.