საქართველოში შვედეთის ელჩის, ულრიკ ტიდესტრომის განცხადებით, მხარს უჭერს საქართველოში ევროკავშირის მედიაციით მიმდინარე დიალოგის პროცესს და ყველა მხარეს შეთანხმებისკენ მოუწოდებს. ამის შესახებ მან საკუთარ ტვიტერზე დაწერა.

"სრულად მხარს ვუჭერ ევროკავშირის მედიაციით მიმდინარე პოლიტიკურ დიალოგს საქართველოში. ვუერთდები მოწოდებას ყველა პარტიისადმი, რომ შეთანხმებას მიაღწიონ. ეს საქართველოს გააძლიერებს", — წერს ის.

ევროპული საბჭოს პრეზიდენტის, შარლ მიშელის წარმომადგენელი, კრისტიან დანიელსონი საქართველოში მეორედ 27 მარტს ჩამოვიდა. ის 28 მარტს საქართველოში ევროკავშირისა და ამერიკის შეერთებული შტატების ელჩსა და არასამთავრობო სექტორის წარმომადგენლებს შეხვდა. მიშელის წარმომადგენელი პოლიტიკურ პარტიებს 29 მარტს შეხვდა.

დანიელსონის პირველი ვიზიტის დროს, 18 მარტს ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

შვედი დიპლომატი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.