საორგანიზაციო ჯგუფის წარმომადგენლებმა ვაშლიჯვარში კორპუსების მშენებლობაზე მორატორიუმის გამოცხადების მოთხოვნით თბილისის მერიაში პეტიცია შეიტანეს. დოკუმენტს უკვე 5 000-მდე ხელმოწერა აქვს.

"ბროწეულის ქუჩა ყველაზე დიდი რისკის წინაშე დგას. მე მაჭავარიანზე ვცხოვრობ და ყველაზე დიდი პრობლემა, რასაც ჩვენ ვხედავთ არის დაუგეგმავი და არასწორი მშენებლობები. ამიტომ, მოვითხოვთ შეიქმნას ჯგუფი, რომელიც მთლიანად ფერდს შეისწავლის და შემდგომი მშენებლობა თუ ინფრასტრუქტურული პროექტი ადგილობრივი მოსახლეობის ჩართულობითა თუ საჯარო განხილვებით გადაწყდეს. ფერდობი მთლიანად უნდა შეისწავლონ და დასკვნა დადონ დამოუკიდებელმა ექსპერტებმა, რომელსაც მოსახლეობა ვენდობით", — ამბობს მაჭავარიანის ქუჩაზე მცხოვრები, თამარ ქოჩლიძე.

17 მარტს ფორუმზე გავრცელდა ფოტოები, სადაც ჩანს, რომ ვაშლიჯვრისა და ნუცუბიძის დამაკავშირებელი გზის ფერდობზე ნაპრალები გაჩნდა. ფოტოების გავრცელებამდე, დილით, თბილისის მერმა, კახა კალაძემ განაცხადა, რომ მაჭავარიანის ქუჩაზე მეწყრული პროცესების გააქტიურების გამო ტრანსპორტის მოძრაობა ორმხრივად შეიზღუდებოდა. კალაძეს არ უთქვამს ზუსტად როდის დაიწყო ეს პროცესები, თუმცა აღნიშნა, რომ დამეწყრილი უბნის შესწავლაში მერიის სამსახურებთან ერთად, შესაბამისი უწყებების სპეციალისტები უკვე ჩართულნი იყვნენ.