ქართული ოცნების დეპუტატის, რიმა ბერაძის განცხადებით, პოლიტიკაში მეტი ადამიანის და ახალი სახეების შემოსვლა მისასალმებელია. ამის შესახებ მან On.ge-სთან საუბარში განაცხადა.

"რაც მეტი ადამიანი იქნება პოლიტიკაში და რაც მეტი ახალი სახე შემოვა, რა თქმა უნდა, მისაღებია ჩვენთვის. ამაში ვერაფერს ვერ ვხედავ ცუდს", — თქვა მან.

ჩვენს კითხვაზე, ხედავს თუ არა მის თავს გახარიას შესაძლო დაბრუნების შემთხვევაში მის გვერდით, რიმა ბერაძე აცხადებს, რომ მის თავს მხოლოდ ქართულ ოცნებაში ხედავს.

"არ ვიცი, ჩემს თავს ვხედავ ქართულ ოცნებაში, ამიტომ დაფუძნების დღიდან ვარ ქართულ ოცნებაში", — განაცხადა მან.

პრემიერობიდან გადადგომის შემდეგ გიორგი გახარიამ ჟურნალისტებს პირველად განუცხადა, რომ პოლიტიკიდან წასვლას არ აპირებს. ტელევიზიით გასულ კადრებში ჩანს, რომ გახარია მთავრობის ადმინისტრაციის ყოფილ ხელმძღვანელთან, კახაბერ ქემოკლიძესთან და პარლამენტში ქართული ოცნების დეპუტატთან, მიხეილ დაუშვილთან ერთად იყო.

"რეალურად, გეგმებს მივყვებით, ჩვენს დღის წესრიგს, რაც მოგვცემს იმის შესაძლებლობას და საშუალებას, რომ უახლოეს პერიოდში ყველაფერი დეტალურად გაგიზიაროთ და მოგიყვეთ", — განაცხადა გახარიამ.

მოგვიანებით, პოლიტიკაში დარჩენის შესახებ მან ფეისბუქზე დაწერა.