სტრატეგია აღმაშენებლის ლიდერი, გიორგი ვაშაძე ქართულ ოცნებას ადანაშაულებს იმაში, რომ დღეს შეთანხმება ვერ შედგა. ათსაათიანი მოლაპარაკებების შემდეგ მედიატორმა კრისტიან დანიელსონმა განაცხადა, რომ ზოგიერთ საკითხზე შეთანხმება ვერ მოხდა.

"პირდაპირ გეტყვით რომ ამდენსაათიანი მუშაობის შედეგად ჩვენ ვერ ვაჩვენეთ მაღალი კულტურა ქართულ საზოგადოებას და ღიად მინდა განვაცხადო რომ ამ ყველაფერში არის დამნაშავე ქართული ოცნება, რადგან მას არ ესმის რა არის ევროპული ინტეგრაცია და ჩემი აზრით დასავლეთმა ნახა ვისთან აქვთ საქმე. ჩვენ ოპოზიციური პარტიები ლოგიკურად ვმსჯელობდით ყველა საკითხზე, მაგრამ ქართული ოცმების მხრიდან ადეკვატურად არაა აღქმული ის მძიმე სიტუაცია, რაც ქვეყანაშია.

თუ დღეს შეთანხმება არაა და მედიატორი ტოვებს ქვეყანას, ამაში დამნაშავეა მხოლოდ და მხოლოდ ქართული ოცნება", — აღნიშნა ვაშაძემ.

მისივე თქმით, ოპოზიციის სამომავლო გეგმებზე მათ კონსულტაციები ექნებათ. ვაშაძის შეფასებითვე, ქართული ოცნება "დესტრუქციულად" მოიქცა.

ოპოზიციისა და მმართველი გუნდის შეხვედრა ევროპული საბჭოს პრეზიდენტის წარმომადგენელთან, კრისტიან დანიელსონთან 10 საათი გაგრძელდა, თუმცა უშედეგოდ დასრულდა — შეთანხმება არ შედგა. დანიელსონის განცხადებით, შეხვედრაზე იყო მნიშვნელოვანი პროგრესი პრეზიდენტ მიშელის დატოვებულ 6-პუნქტიან გეგმის ირგვლივ ზოგიერთ პუნქტზე.

დანიელსონმა აღნიშნა, რომ ხვალ, 19 მარტს საქართველოს დატოვებს და ბრიუსელში დაბრუნდება. მისი თქმით, შარლ მიშელს მოლაპარაკების დეტალებს მოახსენებს.

დანიელსონის შემდეგ ბრიფინგზე ოპოზიციის და მმართველი გუნდის ლიდერები გამოვიდნენ. ამჯერადაც მათ შეთანხმების ვერმიღწევაში ერთმანეთი დაადანაშაულეს. აღსანიშნია ისიც, რომ ოპოზიცია ამ მოვლენების უკან ბიძინა ივანიშვილის ხელს ხედავდა, მმართველი გუნდი კი მიხეილ სააკაშვილისას.