სერიალი Killing Eve მეოთხე სეზონით დასრულდება, თუმცა BBC America სპინოფების გადაღებაზე ფიქრობს.

მძაფრსიუჟეტიანი დეტექტივის მეოთხე სეზონის გადაღებები პანდემიის გამო გადაიდო, მაგრამ პროექტზე მუშაობა ზაფხულის დასაწყისში ისევ განახლდება. გადაღებები გაერთიანებული სამეფოსა და ევროპის სხვადასხვა ლოკაციაზეა დაგეგმილი. შოუ ეკრანებს 2022 წელს დაუბრუნდება.

სერიალის მეოთხე სეზონის მთავარი სცენარისტი და აღმასრულებელი პროდიუსერი ლორა ნილი იქნება, რომელიც ნეტფლიქსის სერიალ Sex Education-ზეც მუშაობდა. ფინალური სეზონის პროდიუსერები ფიბი უოლერ-ბრიჯი, სანდრა ო, სალი ვუდვარდ ჯენთლი, ლი მორისი, ჯინა მინგაჩი და დეიმონ თომასიც არიან.

ფსიქოპათი მკვლელის, ვილანელის როლს ჯოდი კომერი ასრულებს, ხოლო ბრიტანელი გამომძიებლის, ივ პოლასტრის როლს სანდრა ო. სპინოფების შესაძლო სიუჟეტი ჯერ-ჯერობით უცნობია, თუმცა ნაკლებ სავარაუდოა, რომ Killing Eve-ის მთავარი პერსონაჟები ახალი სერიალის გმირებად მოგვევლინონ

სანდრა ომ ფანებს და გადამღებ ჯგუფს მადლობა გადაუხადა და სერიალის ფინალურ სეზონს მოულოდნელი უწოდა.

"Killing Eve დიდებული გამოცდილება იყო და ივის შესანიშნავ გონებაში კიდევ ერთხელ ჩახედვას მოუთმენლად ველი. მადლობას ვუხდი მსახიობებს და გადამღებ ჯგუფს, რომელთაც ეს ამბავი სისრულეში მოიყვანეს, ასევე ფანებს, რომლებმაც ეს გზა ჩვენთან ერთად გაიარეს და აღმაფრთოვანებელ, მოულოდნელ ბოლო სეზონსაც აღტაცებით ელიან", — აღნიშნა ომ.

ჯოდი კომერმა კი აღნიშნა, რომ ისეთ სეზონს შექმნიან, რომელიც ყველას დიდხანს დაამახსოვრდება.

"Killing Eve ყველაზე გასაოცარი მოგზაურობა იყო და მუდამ მადლიერი ვიქნები ამ გამოცდილების გამო. მადლობა ფანებს, რომლებიც ამ გზაზე დაგვემგზავრნენ. ყველაფერი კარგი ერთ დღეს სრულდება, მაგრამ ჯერ არაფერი დამთავრებული. ჩვენი მიზანი ისეთი სეზონის შექმნაა, რომელიც ყველას დიდხანს ემახსოვრება" — განაცხადა კომერმა.

სერიალის პრემიერა 2018 წელს შედგა და წინა სეზონებმა 5 ოქროს გლობუსის და 19 ემის ნომინაციის მოპოვება შეძლო.

გაიგე, Killing Eve-დან ვილანელი ხარ თუ ევა — ტესტი