ბრიუსელში ვიზიტით მყოფი საქართველოს პრემიერმინისტრი, ირაკლი ღარიბაშვილი აცხადებს, რომ 2020 წლის ოქტომბერში ჩატარებული საპარლამენტო არჩევნები საპარლამენტო დემოკრატიის ეტაპზე გადასვლის ისტორიული მოვლენა იყო.

"2020 წლის ოქტომბერში ჩატარებული საპარლამენტო არჩევნები საპარლამენტო დემოკრატიის ეტაპზე გადასვლის ისტორიული მოვლენა იყო და როგორც იყო ნახსენები ფუნდამენტური ადამიანის უფლებები და თავისუფლება დაცული გახლდათ. ჩვენთვის მნიშვნელოვანია ახლა კიდევ უფრო დინამიური გახდეს და ევროკავშირსა და საქართველოს შორის ურთიერთობები მომავალზე იყოს ორიენტირებული", — განაცხადა ღარიბაშვილმა საქართველო-ევროკავშირის ასოცირების საბჭოს სხდომის შემდეგ გამართულ ერთობლივ პრესკონფერენციაზე.

პრემიერმინისტრი ბრიუსელში 15 მარტს გაემგზავრა. ის საქართველო-ევროკავშირის ასოცირების საბჭოს მე-6 სხდომაში მონაწილეობს.

ვიზიტის ფარგლებში იმართება მაღალი დონის შეხვედრები როგორც ევროკომისიაში, ევროპულ საბჭოსა და ევროპარლამენტში, ასევე — NATO-ში.

17 მარტს შეხვედრები შედგება ევროპარლამენტსა და ნატოში. საქართველოს მთავრობის მეთაურს ნატოს შტაბბინაში ალიანსის გენერალური მდივანი იენს სტოლტენბერგი უმასპინძლებს. შეხვედრის შემდეგ, ირაკლი ღარიბაშვილის და იენს სტოლტენბერგის ერთობლივი პრესკონფერენცია გაიმართება. ასევე, დაგეგმილია ნატო-საქართველოს კომისიის სხდომა.

საქართველოს დელეგაციაში, რომელსაც პრემიერმინისტრი ხელმძღვანელობს, ვიცე-პრემიერი, საგარეო საქმეთა მინისტრი დავით ზალკალიანი, ეკონომიკისა და მდგრადი განვითარების მინისტრი ნათია თურნავა და იუსტიციის მინისტრი გოჩა ლორთქიფანიძე იმყოფებიან.