Gen Z ფილტრების გამოყენებაზე, სილამაზის ბოლო დროს დამკვიდრებულ სტანდარტებზე, მაკიაჟის ხრიკებზე და სოციალური მედიის სხვა მოთხოვნებზე უარს ამბობს. ეს თაობა წინასწარდაგეგმილი ფოტოების გადაღებაზე მეტად მოულოდნელ კადრებს ამჯობინებს. ახალი TikTok ტრენდი კი, რომელსაც მომღერალი ლიზოც შეუერთდა, ვიდეოპლატფორმაზე არსებულ ნეგატიურ სტანდარტებს ეწინააღმდეგება. მომღერალმა TikTok-ის სტანდარტები ადრეც გააკრიტიკა, როდესაც მისი ბიკინიში გადაღებული ვიდეო დაბლოკეს.

ტრენდს ფონად კენდრიკ ლამარის სიმღერა — Humble (მოკრძალებული) გასდევს და მომხმარებლები ფილტრის, მაკიაჟის, კორსეტის თუ სხვა საშუალებების გამოყენებით და მის გარეშე გადაღებულ კადრებს ავრცელებენ. TikTok-ის მომხმარებლები ამ გზით სხეულის მიმღებლობას უწყობენ ხელს და ცდილობენ პლატფორმის უზარმაზარ აუდიტორიას მაგალითი უჩვენონ. ჩვენი ყოველი შრამი, აკნე, სტრიები, ნებისმიერი სხეულის ფორმა თუ ჭარბთმიანობა თანაბრად ლამაზია და მისი შეყვარება უნდა ვისწავლოთ.

თუ გამოცდილი ტიკტოკერი ხარ და ამ აპლიკაციაზე ბევრი სასაუბრო დაგიგროვდა, შემოგვიერთდი ჯგუფში – Georgian TikTok Community - ქართული ტიკტოკი.