2021 წლის გრემის დაჯილდოების ცერემონია სულ რამდენიმე საათში დაიწყება. წელს, კორონავირუსის პანდემიის გამო, შოუ უჩვეულო ფორმატით ჩატარდება — აუდიტორიის გარეშე და ნაწილობრივ, წინასწარ ჩაწერილი პერფორმანსებით. მიუხედავად ამისა, პროდიუსერები დაუვიწყარ საღამოს გვპირდებიან.

ასევე იხილეთ:

დაუვიწყარ საღამოზე არ იმღერებს ბიონსე — მომღერალი, რომელიც გრემის წლევანდელ შოუზე ყველაზე მეტ ნომინაციაშია წარდგენილი.

12 მარტს The Los Angeles Times-მა გაავრცელა ინფორმაცია, რომ 8 კატეგორიის 9 ნომინაციაში წარდგენილმა მომღერალმა უარი თქვა, რიგით 63-ე გრემის დაჯილდოებაზე პერფორმანსით გამოსულიყო. ბიონსე ინფორმაციას არ გამოხმაურებია და არც ის დაუკონკრეტებია, დაესწრება თუ არა ღონისძიებას.

"სამწუხაროა, რადგან იგი ხმისჩამწერი აკადემიის მნიშვნელოვანი ნაწილია", — განაცხადა ამერიკის ხმისჩამწერი აკადემიის აღმასრულებელმა დირექტორმა, ჰარვი მეისონ უმცროსმა, — "ცხადია, დიდი სურვილი გვქონდა, რომ სცენაზე გვეხილა".

გასულ წლებში ბიონსეს არაერთხელ ჰქონია პერფორმანსი გრემის დაჯილდოების ცერემონიაზე. შოუს უახლეს ისტორიაში კი იგი მესამე მომღერალია, რომელმაც ყველაზე მეტ ნომინაციაში წარდგენის მიუხედავად, ცერემონიაზე შესრულებაზე უარი თქვა. 2019 წელს ასე მოიქცა კენდრიკ ლამარი, 2018-ში კი ბიონსეს ქმარმა, Jay-Z-მ მიიღო მსგავსი გადაწყვეტილება.

ბიონსეს შოუზე არგამოსვლის ამბის გავრცელების პარალელურად, ინტერნეტსივრცეში ხმისჩამწერ აკადემიას ქალებისა და არათეთრკანიანი მომღერლების წინააღმდეგ მიმართულ მიკერძოებულ დამოკიდებულებაში ადანაშაულებენ. კრიტიკის საფუძველი ყველაზე მეტად კანადელი მუსიკოსის, The Weeknd-ის ნომინაციებში არყოფნაა. ამ უკანასკნელმა მოგვიანებით გრემის მომავალ დაჯილდოებებზე მონაწილეობაზეც უარი თქვა და ორგანიზატორები კორუმპირებულობაში დაადანაშაულა.

მიუხედავად ბრალდებებისა, მეისონი ამბობს, რომ ხმისჩამწერი აკადემია ყოველწლიურად იხვეწება, იძენს ათასობით ახალ წევრს და ცდილობს, კომიტეტებში მეტი ქალი და არათეთრკანიანი თანამშრომელი იყოს.

ბიონსეს და The Weeknd-ის არყოფნის მიუხედავად, ცერემონიაზე არაერთი ცნობილი მუსიკოსი და ჯგუფი იმღერებს, მათ შორის, ტეილორ სვიფტი, ბილი აილიში, Megan Thee Stallion, Cardi B, BTS და სხვა. შოუს კი ჰარი სტაილსი გახსნის.

გრემის 2021 წლის დაჯილდოება თავდაპირველად იანვრის მიწურულს იყო დაგეგმილი, თუმცა, ეპიდსიტუაციის გათვალისწინებით რამდენიმე კვირით გადაიდო. შოუ 15 მარტს, თბილისის დროით დილის 4 საათზე დაიწყება. მასთან დაკავშირებულ ყველა სიახლეს On.ge შემოგთავაზებთ.