ნოვრუზის დღესასწაულთან დაკავშირებით საქართველოს აზერბაიჯანული თემი 21 მარტს, ერთი დღით კომენდანტის საათის გაუქმების მოთხოვნით პრემიერმინისტრს მიმართავს. ისინი გადაადგილების თავისუფლებაზე შეზღუდვის მოხსნას ქვეყნის მასშტაბით მოითხოვენ.

"მიგვაჩნია, რომ არასწორი იქნებოდა მხოლოდ ქვემო ქართლში, ან მხოლოდ, საქართველოს აზერბაიჯანელი თემისთვის ამ შეზღუდვის ერთი დღით გაუქმება, რადგანაც ჩვენთვის ეს დღესასწაული (და არც საქართველოს აზერბაიჯანელი თემი) კონკრეტული რეგიონით ან ვიწრო ეთნიკური ხაზებით არ არის შემოფარგლული. ჩვენ ამ დღესასწაულს ჩვენს ქართველ, სომეხ, მუსლიმ ქართველ, ქისტ, იეზიდ და სხვა მეგობრებთან ერთად აღვნიშნავთ", — აცხადებენ საქართველოს ეთნიკურად აზერბაიჯანელი თემის წარმომადგენელი ახალგაზრდები.

21 მარტს საქართველოს აზერბაიჯანული თემი ნოვრუზს აღნიშნავს. ნოვრუზის რიტუალების ძირითადი ნაწილი კოცონის დანთება, ბაირამის მილოცვა, ბაირამის სუფრაზე დასწრება, ბავშვების მიერ ტკბილეულისთვის მეზობლების კართან ქუდის დაგდება, პოზიტიური ამბების გაზიარება და მოსმენა, ნაჩხუბრების შერიგება, წითელი კვერცხებით შეჯიბრია და ა.შ.

აზერბაიჯანული თემის განცხადებით, ეს ყველაფერი საღამოს საათებში სრულდება, ხოლო საღამოს 9 საათისთვის დაწესებული გადაადგილების თავისფულების შეზღუდვა აღნიშნული რიტუალების სრულფასოვნად ჩატარებაში ხელს უშლით.

ირაკლი ღარიბაშვილის სახელზე განცხადებას ხელს აწერს:

  • ქამრან მამმადლი — პლატფორმა სალამი;
  • სამირა ბაირამოვა — სამოქალაქო აქტივისტი;
  • რაშან ზიადალიევი — სამოქალაქო აქტივიზმისა და ჩართულობის ცენტრი;
  • ნაზარლოს სათემო ცენტრი;
  • ალგეთის სათემო ცენტრი;
  • კასუმლოს სათემო ცენტრი;
  • აღმამედლოს სათემო ცენტრი;
  • ქვემო სარალის სათემო ცენტრი;
  • სოლიდარობის ცენტრი (ვახტანგისის სათემო ცენტრი);
  • სამოქალაქო ინტეგრაციის ფონდი;
  • ახალი აზროვნების ინსტიტუტი;
  • აქტუალ მედია.