ჭყონდიდის ახალმა მიტროპოლიტმა სტეფანემ ორ დიაკონს — კონსტანტინე გაბისონიასა და პეტრე ღუდუშაურს — მღვდელმსახურება შეუჩერა. როგორც საპატრიარქო ინფორმაციას ავრცელებს, ბრძანება მღვდელმთავარმა მას შემდეგ გამოსცა, რაც დიაკვნებმა, წერილობითი თუ პირადი გაფრთხილებების მიუხედავად, უარი განაცხადეს ეპარქიის ახალ მმართველ მიტროპოლიტთან ერთად მსახურებაზე.

"მრავალი გაფრთხილებისა და შეგონების პასუხად, მათ უცნაური "მიმართვა" გამოაგზავნეს, რომელშიც განაცხადეს, რომ "ძალა არ შესწევთ", "ღვთისგან" მათზე "დაკისრებული სადიაკვნე მსახურების" ჭყონდიდის მიტროპოლიტის "გვერდით აღსრულებისა". ამ "მიმართვის" მიღების შემდეგ, ჩვენ კვლავ შევეცადეთ მათი, ახლა უკვე წერილობითი შეგონება და მათზე დაკისრებული მოვალეობის აღსრულებისკენ მოწოდება, თუმცა, მათ ეს ბოლო გაფრთხილებაც უგულებელჰყვეს", — აღნიშნულია განცხადებაში.

როგორც ჭყონდიდის ეპარქიის მიერ გავრცელებულ წერილშია აღნიშნული, მღვდელმსახურებაში მათი აღდგენის საკითხი განიხილება მხოლოდ მათ მიერ "გულწრფელი სინანულის საჯარო გამოხატვის შემთხვევაში".

"ბოლო გაფრთხილება ეძლევა დიაკონ ანანია კალანდიას, რომელიც მხოლოდ ერთხელ (აბაშაში), ისიც დაგვიანებით, გამოცხადდა მსახურებაზე. მოვუწოდებ მას, დაემორჩილოს მღვდელმთავრის ლოცვა-კურთხევას, წინააღმდეგ შემთხვევაში, იძულებული ვიქნებით მასაც ავუკრძალოთ მსახურება", — ვკითხულობთ განცხადებაში.

სინოდის გადაწყვეტილებით, ცაგერისა და ლენტეხის ეპარქიის მმართველმა მიტროპოლიტმა სტეფანემ ჭყონდიდის ეპარქიის მმართველობა შეითავსა. ეპისკოპოსმა გრიგოლ კაციამ ჭყონდიდის ეპარქიიდან გათავისუფლება ითხოვა და ის წალკის ეპარქიის მმართველად დადგინდა.

ჭყონდის მმართველი მას შემდეგ შეეცვალა, რაც სინოდმა მიტროპოლიტ პეტრეს მღვდელმსახურება შეუჩერეს და ეპარქიას ჩამოაშორეს. 2019 წელს სინოდის სხდომის დასრულების შემდეგ მეუფე პეტრემ განაცხადა, რომ ეკლესიაში "მამათმავლობის ცოდვის" მხილების გამო პატრიარქმა მღვდელმთავრობიდან გადააყენა.