საქართველოს სახელმწიფოს დაცვის სპეციალური სამსახურის უფროსისა და TV პირველის მიერ გავრცელებული აუდიოჩანაწერების ერთ-ერთი ფიგურანტის, ანზორ ჩუბინიძის განცხადებით, ეს იყო გამიზნული პროვოკაცია და იუმორის გარეშე ვერ შეხედავს.

"ეს იყო გამიზნული პროვოკაცია დაფუძნებული რაღაც გაუგებარ ჩანაწერებზე, თუმცა ჩემთვის გასაოცარი იყო ამ დროისთვის საოცარი სიღრმე უტიპრობისა და აბსურდულობისა. აბსურდული მცდელობა, რომ საზოგადოება დაარწმუნო იმაში, რომ ანზორ ჩუბინიძე დადის კარდაკარ და ქუჩა-ქუჩა ბავშვებს დასდევს და უსწორდება. ამას მე იუმორის გარეშე ვერ მივიღებ და ქართულ საზოგადოებამ შეაფასოს თვითონ ეს ბრალდება, თუმცა ჩემთვის გასაოცარია ამ ბოროტული განზრახვის საფუძველი. გასაგებია, რომ ეს არის დისკრედიტაცია, გამიზნული დისკრედიტაცია მმართველი გუნდის, რა თქმა უნდა და ძალოვანი სტრუქტურების ხელმძღვანელების", — განაცხადა მან იმედის ეთერში.

TV პირველმა გუშინ გაავრცელა ჩანაწერები, სადაც, სავარაუდოდ, ირაკლი ღარიბაშვილი, ბერა ივანიშვილი და ანზორ ჩუბინიძე იმ ადამიანების დასჯას გეგმავენ და განიხილავენ, ვინც ბერა ივანიშვილს აგინებს. ჩანაწერში საუბარია უკვე მომხდარ ფაქტებზეც, რომელთა მოყოლის პროცესში სავარაუდოდ, ირაკლი ღარიბაშვილი და ბერა ივანიშვილი იციანიან. სავარაუდოდ, ქართული ოცნების დამფუძნებლის შვილი კმაყოფილებას გამოხატავს იმის გამო, რომ მისი გინებისთვის ადამიანები ისჯებიან.

ამ დროისთვის უცნობია, ავთენტურია თუ არა ჩანაწერები. ქართული ოცნების რამდენიმე ლიდერმა ჯერ კიდევ გადაცემის ანონსის შემდეგ თქვა, რომ ეს არის "ფაბრიკაცია" და "შეკოწიწებული". თავდაპირველად ჩანაწერის გაკეთების თარიღად მათ 2011 წელი დაასახელეს, შემდეგ კი — 2010. ჩანაწერებს ამ დრომდე არ გამოხმაურებია შინაგან საქმეთა სამინისტრო, მიუხედავად იმისა, რომ ისმის სავარაუდო ძალადობისა და მომავალი ძალადობის გეგმების შესახებ. კომენტარები არ გაუკეთებიათ არც პრემიერმინისტრ ღარიბაშვილსა და ბერა ივანიშვილს.