ნეტფლიქსის ისტორიაში ყველაზე მაღალი ბიუჯეტის მქონე ფილმს ვარსკვლავური შემადგენლობა ეყოლება. რაიან გოსლინგი, კრის ევანსი და ანა დე არმასი ძმები რუსოების The Gray Man-ის ცნობილი მსახიობების მხოლოდ მცირე ნაწილია, ფილმს ახლახანს ბილი ბობ ტორნტონი, ალფრი ვუდარდი და ბრიჯერტონის ვარსკვლავი, რეგე-ჟან პეიჯი შეუერთდნენ. ფილმში ასევე ითამაშებენ ვაგნერ მორა, ჯესიკა ჰენვიკი, დენაში და ჯულია ბატერსი.

რაიან გოსლინგი და კრის ევანსი Netflix-ის ახალ ჯაშუშურ თრილერში მონაწილეობენ

$200-მილიონიანი პროექტის გადაღების პროცესი ორ კვირაში, ლოს ანჯელესში დაიწყება. ფილმი მარკ გრინის წიგნების სერიის სადებიუტო ნაწარმოებს ეფუძნება, რომელიც 2009 წელს გამოიცა და დაქირავებული მკვლელისა და სადაზვერვო სამსახურის ყოფილი აგენტის შესახებ გვიყვება. მძაფრსიუჟეტიან თრილერში მთავარ როლებს გოსლინგი და ევანსი შეასრულებენ.