საზოგადოებრივი მაუწყებლის გენერალური დირექტორის ვასილ მაღლაფერიძის თქმით, საზოგადოებრივ მაუწყებელს იმდენად დაბალი რეიტინგი აქვს, რომ არ შეიძლება მის მიმართ არსებობდეს პოლიტიკური ინტერესი. მისივე განცხადებით, საზოგადოებრივი მაუწყებელი მხოლოდ საზოგადოების ინტერესებს უნდა გამოხატავდეს:

"არც GDS-ის და არც არცერთი კერძო ტელევიზიის თუ არც სხვა მედიაორგანიზაციის საზომი არ შეიძლება მიუდგეს საზოგადოებრივ მაუწყებელს. ნებისმიერი კერძო არხი მისი მფლობელის ეკონომიკურ და პოლიტიკურ ინტერესებთან კორელაციაშია. ეს ასეა საქართველოშიც და მსოფლიოშიც. საზოგადოებრივი არხი უნდა გამოხატავდეს მაქსიმალურად საზოგადოების ინტერესებს. სად გამოჩნდება პოლიტიკური მიკერძოებულობის საკითხი საზოგადოებრივ მაუწყებელზე? არხს, რომელსაც 1,85 პროცენტი რეიტინგი აქვს, მის მიმართ პოლიტიკური ინტერესი არ შეიძლება არსებობდეს".

საზოგადოებრივი მაუწყებლის მენეჯმენტი ამ წუთებშიც ხვდება არასამთავრობო ორგანიზაციებს, სადაც მაუწყებლის რეფორმაზე მსჯელობენ.