ჯანდაცვის მინისტრის მოადგილის, თამარ გაბუნიას განცხადებით, საქართველოში ვაქცინების მოწოდების 2 ან 3 კვირით გადავადების შესახებ Covax-ის პლატფორმიდან 22 თებერვლის წერილში აცნობეს. გაბუნია ამას Pfizer-ის მხრიდან დამატებითი მოთხოვნების დაყენებით ხსნის.

"22 თებერვლის წერილში, რომელიც განმარტების სახით მივიღეთ Covax-ის პალტფორმიდან Pfizer-ის ვაქცინის გადავადებასთან დაკავშირებით, მკაფიოდ არის მითითებული, რომ უკანასკნელი სამი კვირის განმავლობაში Covax-ის პალტფორმას ჰქონდა აქტიური კომუნიკაცია Pfizer-თან. იმის გამო, რომ Pfizer-მა დააყენა დამატებითი მოთხოვნები პასუხისმგებლობის ფინანსურ გადაზღვევასთან დაკავშირებით, ამ ეტაპზე, ვიდრე ფაიზერი არ გადაჭრის ამ თემას საქართველოს მთავრობასთან და ასევე, კოვაქსთან, ვაქცინების მოწოდება გადავადდება. ამ შემთხვევაში საუბარი 2 ან 3 კვირით გადავადებაზე. მეტ გადავადებაზე არც Covax-ი და არც Pfizer-ი არ საუბრობს", — განაცხადა გაბუნიამ ჯანდაცვის სამინისტროში გამართულ ბრიფინგზე.

მინისტრის მოადგილის თქმით, ინფორმაცია, თითქოს, საქართველომ არ და ვერ დააკმაყოფილა მზაობის მოთხოვნა ვაქცინის მისაღებად, სიმართლეს არ შეესაბამება და Pfizer-ის ვაქცინის შემოტანის გაჭიანურება ფინასური გადაზღვევასთან არის დაკავშირებული. ის, ასევე, ამბობსს, რომ დამატებითი დეტალები Covax-მა და კომპანიამ სატელეფონო ზარით უნდა შეატყობინონ, რომელსაც 23 თებერვლის შემდეგ ელოდებიან.

საქართველოში Covid-19-ზე ვაქცინა, ჯერჯერობით, არ შემოსულა. პირველი ვაქცინა, რომელიც საქართველოში უნდა შემოსულიყო Pfizer-ია. ჯანდაცვის სამინისტროში აცხადებდნენ, რომ თებერვლის ბოლოს საქართველო 29 250 დოზა Pfizer-ის ვაქცინას მიიღებდა, რომელიც 14 500-მდე სამედიცინო პერსონალზე იქნებოდა გათვლილი.

ჯანდაცვის მინისტრის მოადგილე, თამარ გაბუნია ამბობდა, რომ COVAX პლატფორმის ფარგლებში, დაახლოებით, მარტის დასაწყისში AstraZeneca-ს 315 000 დოზა შემოვიდოდა. ხოლო AstraZeneca-სთან პირდაპირი მოლაპარაკებების საფუძველზე, გაბუნიას თქმით, საქართველო 150 ათას დოზა ვაქცინას მიიღებდა.

გაიგეთ მეტი: